काठमाडौं । चालु आर्थिक वर्षमा सय वटा कम्पनीले लाभांश घोषणा गरेका छन् । यसरी लाभांश घोषणा गर्नेहरुमा दोस्रो बजारमा सुचिकृत भएर कारोबार भइरहेका धेरै छन् भने केही कम्पनी सुचिकृत नभएका पनि छन् ।

लाभांश घोषणा गरेका सुचिकृत कम्पनी तथा सुचिकृत कम्पनीका सहायक कम्पनीमध्ये १४ वटा कम्पनीले भने ४० प्रतिशतभन्दा बढी लाभांश दिने घोषणा गरेका छन् । ती कम्पनीमध्ये पनि युनिलिभर नेपालले भने ६५० प्रतिशत लाभांश दिने घोषणा गरिसकेको छ । युनिलिभर नेपाल नेप्सेमा सुचिकृत कम्पनी हो ।

कम्पनीहरुले गरेको घोषणा अनुसार यो वर्ष सबैभन्दा बढी लाभांश घोषणा गर्ने दोस्रो नम्बरमा ग्लोबल आईएमई समुन्नत स्कीम–१ छ । यो स्कीमले आफ्ना इकाईधनीहरुलाई शतप्रतिशत लाभांश दिने घोषणा गरेकाे छ । समुन्नत स्कीम–१ पनि नेप्सेमा सुचिकृत छ । युनिलिभर नेपाल र ग्लोबल आईएमई समुन्नत स्कीम–१ ले शतप्रतिशत नगद लाभांश दिने घोषणा गरेका छन् ।

यस्तै, हाथवे इन्भेष्टमेन्ट नेपालले ५५ प्रतिशत लाभांश दिदैछ । सो कम्पनीले ३० प्रतिशत नगद लाभांश र २५ प्रतिशत बोनस सेयर दिने घोषणा गरेको छ । हाथवे इन्भेष्टमेन्ट नेपाल नेप्सेमा सुचिकृत कम्पनी होइन । महिला लघुवित्त वित्तीय संस्थाले ५० प्रतिशत लाभांश दिने घोषणा गरेको छ । महिला लघुवित्तले २.५ प्रतिशत नगद लाभांश र ४७.५ प्रतिशत बोनस सेयर दिने भएको छ । महिला लघुवित्त वित्तीय संस्था भने नेप्सेमा सुचिकृत कम्पनी हो ।

नेप्सेमा सुचिकृत सनराइज फष्ट म्युचुअल फण्ड र एनआईबीएल प्रगति फण्डले ५०/५० प्रतिशतका दरले नै लाभांश दिने घोषणा गरेका छन् । यी कम्पनीहरुले शतप्रतिशत नगद लाभांश दिने घोषणा गरेका हुन् । नेप्सेमा सुचिकृत नभएको खुल्लामुखी योजना एनआईबीएल सहभागिता फण्डले पनि ५० प्रतिशत नगद लाभांश दिने घोषणा गरेको छ ।

एनआईसी एसिया क्यापिटलले ४८ प्रतिशत नगद लाभांश दिने भएको छ । यो कम्पनी एनआईसी एसिया बैंकको सहायक कम्पनी हो र नेप्सेमा सुचिकृत कम्पनी होइन ।

यस्तै, प्रभु क्यापिटलले २८.३८८५ प्रतिशत बोनस सेयर र १७.६१ प्रतिशत नगद लाभांश गरी ४५.९९८५ प्रतिशत लाभांश दिने घोषणा गरेको छ । प्रभु क्यापिटल पनि नेप्सेमा सुचिकत भएको कम्पनी होइन । यो कम्पनी प्रभु बैंकको सहायक कम्पनी हो ।

नेप्सेमा सुचिकृत नभएका सनराइज बैंकको सहायक कम्पनी सनराइज क्यापिटल र सिद्धार्थ बैंकको सहायक कम्पनी सिद्धार्थ क्यापिटलले ४०÷४० प्रतिशत नगद लाभांश दिने घोषणा गरेका छन् । नेप्सेमा सुचिकृत नबिल इक्वीटी फण्ड तथा सिटिजन्स म्युचुअल फण्ड–१ र २ ले ४०÷४० प्रतिशतका दरले लाभांश दिने घोषणा गरेका छन् । यी सबै कम्पनीहरुले नगद लाभांश मात्रै दिने घोषणा गरेका हुन् ।

कुन कुन कम्पनीको लाभांश अझै पाइन्छ ?

कम्पनीहरुले प्रदान गर्ने भनेर घोषणा गरेको लाभांश सो कम्पनीको बुक क्लोज हुनुअघि कायम रहेका सेयरधनीले मात्रै पाउँछन् । त्यसैकारण बुक क्लोज भइसकेपछि सेयर खरिद गर्ने सेयरधनीले लाभांश खानको लागि अर्काे वर्षसम्म कुर्नुपर्ने हुन्छ ।

लाभांश घोषणा गर्ने सुचिकृत कम्पनीहरुमा सिटिजन्स म्युचुअल फण्ड–१ र २, नबिल इक्वीटी फण्ड, एनआईबीएल प्रगति फण्ड, एनआईबीएल सहभागिता फण्ड, सनराइज फष्ट म्युचुअल फण्ड र युनिलिभर नेपालको पनि बुक क्लोज भइसकेकोले कम्पनीले यसपाली घोषणा गरेको लाभांश अब सेयर खरिद गर्ने लगानीकर्ताले पाउने छैनन् ।

कति लाभांश खान कति मूल्य तिर्नुपर्छ ?

लाभांश घोषणा गरेका तर बुक क्लोज भइनसकेका कम्पनीहरुको लाभांश प्राप्त गर्नको लागि लगानीकर्ताले बुक क्लोजअघि नै सेयर खरिद गर्नुपर्ने हुन्छ । लाभांश प्राप्त गर्नको लागि यतिबेला सेयर वा म्युचुअल फण्डको इकाई खरिद गर्दा अन्य समयको भन्दा केही महंगो पनि पर्न सक्छ ।

यसका लागि हामीले आज (कात्तिक २२ गते) नेपाल स्टक एक्सचेन्जमा कारोबार बन्द हुँदा कायम भएको मूल्यलाई लिएका छौं । यसरी हेर्दा यो वर्ष लाभांश घोषणा गरेकामध्ये ४० प्रतिशतभन्दा बढी लाभांश दिने कम्पनीको सेयर वा इकाई महंगो मूल्यमा भएपनि किन्छु भन्नेहरुका लागि दुईटा विकल्पमा मात्रै छ । शतप्रतिशत नगद लाभांश दिने घोषणा गरेको ग्लोबल आईएमई समुन्नत स्कीम-१ को इकाई दोस्रो बजारमा किन्न पाइन्छ र बुक क्लोज पनि भइसकेको छैन । तर, यो स्कीमको इकाई खरिद गर्नको लागि अंकित मूल्यमा १० रुपैयाँभन्दा बढी थपेर २१.२० रुपैयाँमा खरिद गर्नुपर्ने हुन्छ । किनभने यो स्कीमको अंकित मूल्य भनेको प्रतिइकाई १० रुपैयाँ हो ।

बुक क्लोज भइनसकेकोले महिला लघुवित्त वित्तीय संस्थाको सेयर किनेर यो वर्ष घोषणा गरिएको ५० प्रतिशत लाभांश भने खान अझै पाइन्छ । तर, दोस्रो बजारमा यो कम्पनीको सेयर मूल्य आज प्रतिकित्ता ५१८० रुपैयाँमा कारोबार बन्द भएको छ ।

सम्बन्धित शिषर्कहरु

रिडी पावरको हकप्रद सेयर बाँडफाँट, वैशाख २० बाट पैसा फिर्ता

कृति भेन्चर फण्डले सर्वसाधारणका लागि आईपीओ निष्कासन गर्ने, डाक्याे साधारण सभा

दिनभर उतारचढाव रहेको सेयर बजार अन्तिम समयमा झिनो अंकले बढ्यो

एक अर्ब बढी लागतमा रारामा पहिलो लक्जरी रिसोर्ट बन्दै, हेलिप्याडको पनि सुविधा

मुक्तिनाथ कृषि कम्पनीको ७० हजार कित्ता सेयरको लकइन अवधि जेठ १८ गते सकिने

नेक्सजेन म्यानेजमेन्टले ६ अर्ब विदेशी लगानी भित्र्याउने, कोरियन कम्पनीसँग सम्झौता