२०७७ जेठ ४ गते १४:४१ विकासन्युज
काठमाडौं। कोरोना भाइरसको कारण जारी लकडाउनलाई दुई हप्ता थप्ने सरकारले तयारी गरिरहेको छ । चैत ११ गतेदेखि जारी लकडाउनकाे समयावधि भाेलि सकिँदै छ । वैशाख २५ गते थप गरिएको लक डाउन सोमबार सकिने भए पनि सरकारले फेरि कम्तीमा दुई हप्ता लक डाउन लम्ब्याउने तयारी गरेको स्राेतले बताकाे छ ।
स्रोतका अनुसार अब लकडाउनलाई थप प्रभावकारी र रणनीतिक तरिकाले अगाडि बढाइने छ । अब लकडाउन कसरी अगाडि बढाउने र कतिसम्म बढाउने भन्नेबार अहिले उच्चस्तरीय समितिको अनौपचारिक बैठक बसिरहेको छ । सो बैठकले लकडाउनलाई कहिले सम्म बढाउने भन्ने मन्त्रिपरिषद्समक्ष सिफारिस गर्नेछ ।
काेराेना भाइरसका बिरामी बढ्दै गएपछि सरकारले लकडाउन पुन: बढाउने तयारी गरेकाे हाे । कोरोना रोकथाम तथा उपचारका लागि भएका प्रयासबारे छलफल गर्न दिउँसो अहिलेउपप्रधानमन्त्री ईश्वर पोखरेल नेतृत्वको उच्च स्तरीय समन्वय समितिको बैठक जारी छ ।
बैठकले कम्तीमा दुई साता लक डाउन थप्न सरकारलाई सिफारिस गर्ने स्राेतले बतायाे । आज नै बालुवाटारमा मन्त्रिपरिषद्काे बैठक पनि बस्दैछ । समन्वयन समितिको सिफारिसका आधारमा बस्ने मन्त्रिपरिषद् बैठकले लक डाउनको अवधि थप गर्ने बताइएकाे छ ।
दिनप्रतिदिन कोरोना संक्रमितको संख्या बढ्दै गइरहेको अवस्थामा सरकार पनि लकडाउन बढाउने र पीसीआर परीक्षणको दायरा बढाउने रणनीतिमा छ ।
यसअघि शुक्रबार प्रधानमन्त्री तथा मन्त्रिपरिषद्को कार्यालयमा बसेको समितिको अनौपचारिक बैठकमा लकडाउन बढाउनेबारे छलफल भएको थियो । अति जोखिम, मध्यम र न्यून जोखिमका क्षेत्र छुट्टयाएर त्यसैअनुसार लकडाउनको मोडालिटी परिवर्तन गर्ने अनौपचारिक निर्णय उक्त बैठकले गरेको थियो ।
राजधानीसहित देशका विभिन्न स्थानमा कोरोना भाइरसको संक्रमण फैलिएपछि सरकारले लकडाउनको अवधी अझै थप गर्ने बुझिएको छ । अवस्था हेरी लकडाउनलाई थप कडाइ गर्ने पनि सरकारको तयारी छ । पछिल्लो दुई दिनमा राजधानी उपत्यकासहित देशैभरि संक्रमितको संख्या बढेको छ । कोरोना संक्रमणकै कारण सिन्धुपाल्चकोककी एक महिलाको मृत्यु भइसकेको छ ।
Copyright © 2024 Bikash Media Pvt. Ltd.