‘व्यक्तित्व विकास’ सम्बन्धी आइआईएमएस कलेजले दियो विद्यार्थीलाई प्रशिक्षण
काठमाडौं । आईआईएमएस कलेजले विद्यार्थीको ‘व्यक्तित्व विकास’ र ‘भावना व्यवस्थापन’बारे विद्यार्थीलाई प्रशिक्षण दिएको छ । प्लस टु सकेर बीबीएमा भर्ना भएका ‘फस्ट सेमेस्टर’का विद्यार्थीहरूलाई प्रशिक्षण दिएको कलेजले जनाएको छ । आइतबार गरिएको कार्यक्रममा फरक-फरक दुई विषयमा विद्यार्थीलाई प्रशिक्षण गराएको हो । आईएआईएमएस कलेजमा भर्ना भएका एक सय जना विद्यार्थीलाई दुई समूहमा विभाजन गरी प्रशिक्षण दिएको हो । आईआईएमएसमा बीबीए पहिलो समेस्टरमा एक सय जना नयाँ विद्यार्थी भर्ना भएका छन् । उनीहरूलाई केन्द्रित गरी कार्यक्रम गरिएको हो । नयाँ विद्यार्थिहरूलाई विश्वविद्यालयको अभ्यास थाहा नहुने भएकाले पनि यस्ता प्रशिक्षणात्मक कार्यक्रम जरुरी हुने स्टुडेन्ट क्लब एण्ड इभेन्ट लिडर श्रेया खड्काले बताइन् । ‘प्लसटुपछि कलेजमा अध्ययन गर्न आउँदा फरक हुन्छ,’ उनी भन्छिन्,‘ कलेजमा आउँदा नयाँ साथी, नयाँ टिचर्स, फरक माहोल हुन्छ , यस्तो माहोलमा कसरी आफू प्रस्तुत हुने विद्यार्थीलाई थाह हुँदैन, कलेजले गर्ने यस्ता कार्यक्रमले विद्यार्थीलाई फाइदा हुन्छ,’ उनले भनिन् । कलेजले हरेक वर्ष यस्तो कार्यक्रम गर्दै आएको छ । यस्ता कार्यक्रमले विद्यार्थीको व्यक्तिगत क्षमतादेखि मान्छेसँग कसरी प्रस्तुत हुने र कस्तो व्यवहार गर्ने भन्नेबारे जानकारी हुन्छ । यस्तो सिकाइले चार वर्ष कलेजमा कसरी पढ्ने ? कस्तो व्यवहार गर्ने ? भन्नेमा सुरुको सिकाइले प्रभाव पार्छ । विद्यार्थीले पनि यसबाट आफुहरूलाई फाइदा भएको बताएका छन् । व्यक्तित्व विकासको कुरा सबैलाई आवश्यकपर्छ । कति कुरा कहाँ, कहिले, कसरी गर्ने भन्ने कुरा धेरैलाई थाहा हुँदैन , म को हुँ भन्ने पनि यसबाटै सिकिने भएकाले यस्तो कार्यक्रम विद्यार्थीलाई आवश्यक पर्ने खड्का बताउँछिन् । यस्तै, विद्यार्थीलाई आफ्ना भावनाको व्यवस्थापन कसरी गर्ने भन्नेबारे जानकारी गराउन ‘म्यानेजिङ इमोशन एण्ड माइन्ड फुल्नेस’सम्बन्धी प्रशिक्षण दिइएको छ । कलेजका शिक्षक रोजल जोशी आजभोलिका युवाहरूलाई यस्तो जानकारी निकै महत्वपूर्ण रहेको बताउँछन् । उनी भन्छन्,‘ प्लस टुबाट भर्खर कलेज आउँदा अनेक भावनाहरू आउँछन्, ती भावनाको व्यवस्थापन कसरी गर्ने भन्ने धेरैजसोलाई थाहा हुँदैन, विद्यार्थी शारीरिकमात्र होइन मानसिक रूपमा पनि तयार रहनुपर्ने भएकाले यस्तो कार्यक्रम गरिएको हो । कलेजले सर्टिफिकेटमात्र दिनुभन्दा पनि व्यवहारिक जीवनमा लागू हुने सीप सिकाउन आवश्यक रहेकाले यस्ता कार्यक्रमहरू गर्दै आएको कलेजले जानकारी दिएको छ । विद्यार्थीलाई पाठ्यक्रममा रहेको ज्ञानमात्र नभइ गैरशैक्षिक मुल्य वृद्धि पाठ्यक्रमबारे पनि जानकारी आवश्यक छ । शिक्षक जोशी एकेडेमिकभन्दा बाहिर बजारमा भिज्न पनि यस्ता कार्यक्रम आवश्यक हुने बताउँछन् । कलेजले अर्को कार्यक्रम आगामी आइतबार गर्ने जनाएको छ ।
एमबिबिएस पढ्ने विद्यार्थीलाई छात्रवृत्ति
कञ्चनपुर । शुक्लाफाँटा नगरपालिकाले चिकित्साशास्त्र (एमबिबिएस) अध्ययन गर्ने सामुदायिक विद्यालयका विद्यार्थीलाई छात्रवृत्ति दिने भएको छ । गरिब तथा जेहेन्दार एक विद्यार्थीलाई छात्रवृत्ति प्रदान गर्नका लागि नगरपालिकाले आवेदन माग गरेको छ । छात्रवृत्तिका लागि नगरपालिका क्षेत्रभित्र स्थायी बसोबास भएका जेहेन्दार, गरिब र विपन्न परिवारका एमबिबिएस पढ्न इच्छुक विद्यार्थीलाई छात्रवृत्ति प्रदान गर्न आवेदन माग गरिएको नगरपालिकाको शिक्षा, युवा तथा खेलकुद शाखाका प्रमुख टिकेन्द्रराज भट्टले बताए । नगरपालिकाको एमबिबिएस अध्ययन छात्रवृत्तिसम्बन्धी कार्यविधि २०८० को दफा ५ मा भएको व्यवस्थाअनुसारका कागजातसहित निवेदन दिन सार्वजनिक सूचनामार्फत आह्वान गरिएको उनले जानकारी दिए । आव २०८०/८१ को नगर सभाबाट स्वीकृत बजेटअनुसार एमबिबिएस पढ्ने विद्यार्थीका लागि पाँच लाख रुपैयाँ बजेट विनियोजन गरिएको छ । प्रत्येक वर्ष नगरपालिकाले एक एमबिबिएस चिकित्सक उत्पादनमा सहयोग गरी नगरवासीलाई दिगो स्वास्थ्य सेवा उपलब्ध गराउने उद्देश्यका साथ गरीब जेहेन्दार, विपन्न परिवारका विद्यार्थीलाई प्रोत्साहन गर्न छात्रवृत्ति कार्यक्रम अघि सारिएको शाखा प्रमुख भट्टको भनाइ छ । योग्यताक्रमको सूचीमा समावेश नगरपालिका क्षेत्रभित्र बसोबास गर्ने विद्यार्थीलाई छात्रवृत्ति प्रदान गरिने नगरपालिकाको सामाजिक विकास समितिका संयोजक रमेशबहादुर ऐरले बताए । चिकित्सको अभाव पूर्ति गर्नका लागि सहयोग पुर्याउन छात्रवृत्ति कार्यक्रम अगाडि सारिएको उनको भनाइ छ । छात्रवृत्ति कार्यक्रमलाई व्यवस्थित र पारदर्शी बनाउनका लागि नगर प्रमुखको संयोजकत्वमा एमबिबिएस अध्ययन छात्रवृत्ति व्यवस्थापन तथा वितरण समिति रहने व्यवस्था गरिएको छ । रासस
त्रिविको पत्रकारिता तथा आमसञ्चार केन्द्रीय विभाग बल्खुमा
काठमाडौं । त्रिभुवन विश्वविद्यालयको पत्रकारिता तथा आमसञ्चार केन्द्रीय विभाग बल्खुस्थित आफ्नै नवनिर्मित भवनमा सरेको छ । चार वर्षको अवधि लगाएर अत्याधुनिक र सुविधासम्पन्न भवन निर्माण सम्पन्न भएपछि लामो सयमसम्म प्रदर्शनीमार्गस्थित रत्नराज्यलक्ष्मी क्याम्पस परिसरबाट सञ्चालित उक्त विभागका सबै कार्यक्रम आगामी फागुन ३ गतेदेखि बल्खुस्थित विश्वविद्यालय हाताभित्रको नयाँ भवनबाट सञ्चालित हुने विभागका प्रमुख प्रा चिरञ्जीवी खनालले जानकारी दिए । त्रिविले विसं २०५८ देखि पत्रकारिता तथा आमसञ्चार विषयमा स्नातकोत्तर, विसं २०६७ देखि विद्यावारिधि र विसं २०७४ देखि दर्शनाचार्य तथा विद्यावारिधि तहको अध्यापन प्रारम्भ गरेको थियो । प्रमुख प्रा खनालले सीमित स्रोतसाधनबीच गुणस्तरीय शिक्षा दिइँदै आएकामा विभागको पहलमा विश्वविद्यालयले भवन बनाइदिएकाले आफ्नै संरचना र पूर्वाधार विकास भएको बताए । सो भवनमा सुविधासम्पन्न कक्षाकोठा, प्राध्यापक कक्ष, रेडियो स्टुडियो, फिल्म अध्ययनस्थल, मल्टिमिडिया कक्ष, पुस्तकालय, अन्तर्राष्ट्रियस्तरको सभाहल, अतिथि (विदेशी) प्राध्यापक आवासलगायत रहेका छन् । उक्त भवन निर्माणका लागि २१ करोड ५९ लाख रुपैयाँको लगतमा भ्याली बाबुरत्न जेभी निर्माण कम्पनीसँग सम्झौता गरिएको थियो । सो भवनको आगामी फागुन २ गते वसन्तपञ्चमीका दिन उद्घाटन गर्ने कार्यक्रम रहेको जनाइएको छ । रासस
