तेह्रथुम, २० पुस । प्रधानमन्त्री पुष्पकमल दाहाल प्रचण्डले तेह्रथुमको सङ्क्रान्तिबजार पुनःनिर्माण तथा पुनःस्थापना कोषमा एक करोड रुपैयाँ दिने घोषणा गरेका छन् । मङ्गलबार सङ्क्रान्तिबजार पुगेर आगलागीस्थलको निरीक्षण तथा अग्निपीडितसँग भेटपछि प्रधानमन्त्री दाहालले प्रधानमन्त्री राहत कोषबाट एक करोड रुपैयाँ दिने बताएका छन् ।

उनले आगलागीपीडितका लागि राहत प्याकेजको घोषणा गर्दै अग्निपीडितको पुनःस्थापना तथा पुनःनिर्माणका लागि बिनाधितो सस्तो ब्याजदरमा ऋण उपलब्ध गराउने पनि बताए । सङ्क्रान्तिबजारमा खानेपानी आयोजना सञ्चालन, दमकल खरिद, विद्युतीकरण, एम्बुलेन्स खरिदमा पनि सरकारले निर्णय लिने प्रधानमन्त्री दाहालले घोषणा गरेका छन् ।

राहत वितरणमा सजिलो हुनेगरी तत्कालै नेपाल बैंक तथा कृषि विकास बैंकका शाखा पुनःस्थापनाको पहल तथा निर्णय गर्ने प्रधानमन्त्री दाहालले बताए । प्रधानमन्त्री दाहालले मुलुक अहिले सबैभन्दा बढी राजनीतिक सङ्कटको घडीमा रहेको भन्दै यसको समाधानतर्फ सबैको ध्यानाकर्षण हुनु जरुरी रहेको बताए । उनले आठराई क्षेत्र ऐतिहासिक र थुप्रै नेताको जन्मस्थान भएर पनि विकासमा पछि परिरहेको देखेको भन्दै आगलागीपछि राज्यकै ध्यानाकर्षण गर्न सकेकाले अब यस क्षेत्रको विकासले गति लिने विश्वास व्यक्त गरेका छन् ।

प्रधानमन्त्री दाहालले जिल्लाको विकासका लागि तमोर जलाशययुक्त आयोजनाको निर्माण अघि बढाउन ऊर्जा मन्त्रालयलाई निर्देशनसमेत दिएको बताए । यस्तै, वसन्तपुर–म्याङलुङ सडकखण्ड कालोपत्र, मध्यपहाडी लोकमार्ग निर्माणमा तीव्रता, पाँचथर—तेह्रथुम जोडिने हाक्पारा घाटमा मोटरेबल पुल निर्माण, तमोर नदीका तटीय क्षेत्रका नौ गाविसमा खानेपानी योजना सञ्चालनका लागि आवश्यक बजेटको व्यवस्था गर्ने प्रधानमन्त्री दाहालले घोषणा गरेका छन् ।

आठराईसँग पुरानो सम्बन्ध रहेको बताउँदै प्रधानमन्त्री दाहालले विद्यार्थी जीवनमा अभ्यास शिक्षणका लागि एक वर्ष यहाँको चुहानडाँडास्थित विद्यालयमा बिताएको स्मरण गरेका छन् ।

कार्यक्रममा नेपाली काँग्रेसका नेता कृष्णप्रसाद सिटौलाले आठराईको विकासतर्फ आगलागीको घटनाले ध्यानाकर्षण गरेको बताएका छन् । आठराईको सङ्क्रान्तिबजारमा जन्मिएका नेता सिटौलाले जन्मभूमिको मायाले पटकपटक तान्ने गरेको र अग्निपीडितका माग, समस्या गुनासा सँगै आठराई क्षेत्रका समस्याबारे प्रधानमन्त्री दाहाललाई जानकारी भएकाले अब विकास निर्माणका काममा राज्यको ध्यान जाने विश्वास व्यक्त गरे ।

नेता सिटौला साताअघि मात्रै सङ्क्रान्तिबजार पुगेर अग्निपीडितलाई भेट गरी सरकारको ध्यानाकर्षण गराउने प्रतिबद्धता जनाउनुभएको थियो । नेकपा (एमाले) का प्रमुख सचेतक भानुभक्त ढकालले संसद्मा एमाले प्रमुख प्रतिपक्षी दल भए पनि सरकारका सकारात्मक कदम र समस्या सुल्झाउन सधैँ साथ र समर्थन रहने बताएका छन्।

कार्यक्रममा काँग्रेस केन्द्रीय सदस्य तथा सभासद् सीता गुरुङ, सभासद् भवानीप्रसाद खापुङ र गणेश विमलीले मन्तव्य राखेका छन् । पुस १ गते भएको भीषण आगलागीमा परी सङ्क्रान्तिबजारका २४ घर पूर्णरुपमा जलेर नष्ट भएका थिए भने अन्य पाँच घरमा आंशिक क्षति पुगेको थियो । आगो निभाउन तीनवटा टहरा भत्काइएका थिए । आगलागीबाट ७३ परिवार विस्थापित भएका छन् । प्रहरी मुचुल्काअनुसार आगलागीबाट १४ करोड आठ लाख रुपैयाँको धनमाल जलेर खरानी भएको थियो ।

अग्निपिडितलाई धरान र दमकबाट राहत

अग्निपिडित परिवारलाई धरान र दमकबाट पनि राहत उपलब्ध भएको छ । सङ्क्रान्तिबजार आइपुगेका धरानबाट सञ्चालित ‘हामी साथी साथी’ समूहका प्रतिनिधिले अग्निपिडित विद्यार्थीलाई ६० थान शैक्षिक सामग्री र न्यानो कपडा, विद्यालय जान उमेर नपुगेका बालबालिका र गर्भवती महिलालाई १९ थान न्यानो कपडा वितरण गरेका छन् । २ वर्षदेखि सामाजिक क्षेत्रमा क्रियाशील साथी साथी समूहको अभियानबाट सङ्कलित रु ८० हजार बराबरको राहत सामग्री उपलब्ध गराइएको समूहका अभियन्ता सुमन श्रेष्ठले जानकारी दिए ।

त्यस्तै, अग्निपीडित परिवारलाई दमक उद्योग वाणिज्य सङ्घ र दमक समाजबाट पनि राहत रकम उपलब्ध भएको छ । समाजबाट एक लाख तीन हजार रुपैयाँ र सङ्घबाट २५ हजार रुपैयाँ राहत रकम उपलब्ध भएको उद्योग वाणिज्य सङ्घ सङ्क्रान्तिबजारका अध्यक्ष प्रेम पौडेलले बताए । सङ्क्रान्तिबजार आइपुगेका सङ्घका कार्यालय सचिव ज्ञाननाथ पौडेल र समाजका प्रतिनिधि तीर्थराज बस्नेतले सो रकम हस्तान्तरण गरेका छन् ।

विभिन्न सङ्घसंस्थाबाट अग्निपीडित परिवारलाई सङ्क्रान्तिबजारमा उपलब्ध भएको ६ लाख एकहजार रुपैयाँ राहत रकम ‘सङ्क्रान्तिबजार पुनःनिर्माण तथा पुनःस्थापना कोष’मा जम्मा गर्न प्रमुख जिल्ला अधिकारी मुनका न्यौपानेको उपस्थितिमा जिविस र स्थानीय विकास कोषका कार्यकारी सचिव कृष्णप्रसाद घिमिरेलाई प्रदान गरिएको उद्योग वाणिज्य सङ्घ सङ्क्रान्तिबजारका अध्यक्ष पौडेलले जानकारी दिनुभयो । यो सँगै सो कोषमा १२ लाखभन्दा बढी रुपैयाँ जम्मा भएको छ । रासस

सम्बन्धित शिषर्कहरु

छोरीहरूलाई कसरी उद्यमी बनाउन सकिन्छ भन्नेबारे सोचिरहेको छु : अर्थमन्त्री पुन

भारतले मागेजति विद्युत नदिँदा नेपाली उद्योगमा लोडसेडिङ भयो : अर्थमन्त्री पुन

अशोक राई नेतृत्वको जसपा निर्वाचन आयोगमा दर्ता

सर्वोच्चद्धारा विज्ञापन नियमावली खारेज गर्न अस्विकार

धनगढी उपमहानगरद्वारा २३ करोड राजस्व संकलन

राष्ट्रिय प्रतिरक्षा विश्वविद्यालय पूर्वाधार विकास समितिको म्याद एक वर्ष थप्ने निर्णय