काठमाडौं । नेपाल उद्योग परिसंघले भारत र बंगलादेशका पर्यटकलाई लक्षित गर्दै समर टुरिजम क्याम्पेन चलाएको छ । बिहीबार परिसंघले काठमाडौंमा पत्रकार सम्मेलन गर्दै भारत र बंगलादेशमा रहेका प्रकृतिप्रेमीहरुलाई नेपाल घुमाउन समर टुरिजम क्याम्पेन सुरु गरेको हो ।

परिसंघका अध्यक्ष विष्णुकुमार अग्रवालले कोभिड १९ पछि भारतीय र बंगलादेशीसहित अन्य मुलुकका पर्यटक समेत विस्तारै बाहिर निस्कन थालेको अवस्थामा उनीहरुलाई नेपालमा आकर्षित गर्न यो अभियान सञ्चालन गरेको बताए । उनले हाल भारत एवं बंगलादेशमा निकै गर्मी रहेको र गर्मी मौसममा उनीहरु बाहिर भ्रमण गर्न निस्कन खोजिरहेको बेला नेपाललाई नै गन्तव्य बनाउन यो अभियानले आकर्षित गर्ने विश्वास लिएको बताए ।

‘पर्यटनले नेपाललाई विश्वमा चिनाएको छ, पर्यटन यस्तो उद्योग हो जहाँ एक विदेशी एक पटक आउँदा त्यसले धेरै क्षेत्रमा मूल्यअभिवृद्धि गर्नुका साथै विदेशी मुद्रा आर्जन हुन्छ, त्यसैले परिसंघले नेपालको पर्यटन प्रवद्र्धन गर्न र पर्यटक भित्र्याउन यो अभियान संचालन गरेको हो,’ उनले भने ।

त्यस्तै नेपाल उद्योग परिसंघका उपाध्यक्ष राजबहादुर शाहले भारत र बंगलादेशको उच्च गर्मीबाट शीतलता खोजिरहेका भारतीय र बंगलादेशी पर्यटकका लागि नेपालको मौसम अनुकुल रहेकाले यो अभियानले उनीहरुलाई आकर्षित गर्ने विश्वास व्यक्त गरे । उनले कोभिडका कारण बाहिर निस्किन नसकेका पर्यटकहरुले यसको लाभ लिने बताए ।

‘नेपालमा जस्तो अनुकूल मौसम अन्य कुनै पनि मुलुकमा छैन, कोभिडका कारण दुई वर्ष बाहिर निस्किएनन्, भारत र बंगलादेशमा अहिले निकै गर्मी छ, त्यसैले उनीहरु नेपालको मौसममा रमाउन आउन यो अभियानले पक्कै आकर्षित गर्नेछ,’ उनले भने ।

परिसंघका महानिर्देशक दीपकराज जोशीले भारत र बंगलादेशमा रहेका परिसंघको नेटवर्कबाट पनि यो अभियान प्रवद्र्धन गरिने बताए । उनले नेपाल पर्यटनको लागि उचित र राम्रो गन्तव्य रहेको बताए । उनले अहिले देशका सबै ठाउँ खुलेको भन्दै पर्यटनमा सहज हुने बताए ।

‘अहिले देशका सबै ठाउँ खुलेका छन्, यसले पर्यटकलाई थप सहज पार्नेछ । नेपालका सबै प्रमुख गन्तव्यहरुमा राम्रो होटलहरु छन् । घुम्ने ठाउँ राम्रो छ । त्यसले पर्यटकलाई लोभ्याउँछ,’ उनले भने ।

परिसंघले भारतमा अल इण्डिया एशोसिएशन अफ इण्डस्ट्रीज, फेडेरेसन अफ इण्डियन इण्डस्ट्रीज, फेडेरेसन अफ इण्डियन च्याम्बर्स अफ कमर्स एण्ड इण्डस्ट्रीज, पीएचडी च्याम्बर अफ कमर्स एण्ड इण्डस्ट्रीसँग सहकार्य गर्दै आएको छ । यस्तै बंगलादेशको मेट्रोपोलिटीन च्याम्बर अफ कमस एण्ड इन्डस्ट्री, र ढाका च्याम्बर अफ कमर्स एण्ड इण्डस्ट्रीसँग पनि परिसंघले सहकार्य गर्दै आएको छ ।

सम्बन्धित शिषर्कहरु

सर्वसाधारण भन्छन् : लगानी सम्मेलन लगानी भित्र्याउने राम्रो अवसर हो

विदेशी मुद्रामा नाफा लैजाने सुनिश्चितताले लगानीको आकर्षण बढाएको छ : प्रधानमन्त्री (पूर्णपाठ)

व्यापार तथा लगानी प्रवर्द्धन र डाटा सेन्टर निर्माणका लागि द्विपक्षीय सम्झौता

कैलाश मानसरोवर दूरदर्शनले नेपालगञ्जका होटल भरिभराउ

लगानीकर्ताका लागि अनुकूल वातावरण बनाउन नेपाल तयार छ : अध्यक्ष अग्रवाल

नेपाल उदार आर्थिक नीतिप्रति प्रतिबद्ध छ, लगानी गर्नुहोस् : प्रधानमन्त्री