२०७८ मंसिर २२ गते १५:२१ विकासन्युज
काठमाडौं । पछिल्लो समय सेयर बजार निरन्तर रुपमा ओरालो लागेको छ । बजारमा नेप्से परिसूचकसँगै सेयर कारोबार रकम पनि दिनानुदिन घट्दै गएको छ ।
बुधबारको बजारमा कूल कारोबार २ अर्ब ६६ करोड रुपैयाँमा खुम्चिएको छ । जुन अघिल्लो दिनको तुलनामा ४६ करोड रुपैयाँले घटी हो । मंगलबारको बजारमा ३ अर्ब १२ करोड रुपैयाँ बराबरको सेयर कारोबार भएको थियो ।
त्यस्तै, नेप्से परिसूचक पनि ५३.१० अंकले घटेर २४५५.८१ बिन्दुमा झरेको छ । जुन करिब एक वर्ष यताकै न्यून बिन्दु हो ।
मंगलबारको तुलनामा बुधबारको बजारमा ७ कम्पनीको मात्रै सेयर मूल्य बढेको छ । जसमध्ये दुई वाणिज्य बैंक रहेका छन् । नेपाल एसबीआई र स्ट्याण्डर्ड चार्टर्डको सेयर मूल्य क्रमशः १.४० र १.९४ प्रतिशतले बढेको छ ।
बजारमा सबैभन्दा बढी सामुदायिक लघुवित्त वित्तीय संस्थाको सेयर मूल्य घटेको छ । संस्थाले सेयरधनीलाई लाभांश वितरण नगर्ने घोषणा गरेसँगै संस्थाको सेयर मूल्य घटेको हो । बुधबारको बजारमा संस्थाको सेयर मूल्य ८.५४ प्रतिशतले घटेर प्रतिकित्ता ११६८ रुपैयाँमा झरेको छ ।
बुधबार कारोबारमा आएका सबै समूह राताम्मे देखिएका छन् । सबैभन्दा बढी जीवन बीमा समूह २९४.४४ अंकले घटेको छ ।
Copyright © 2024 Bikash Media Pvt. Ltd.
