समाज : खेलकुद

काठमाडौं । सरकारले अन्तर्राष्ट्रिय प्रतियोगितामा पदक जित्ने नेपाली खेलाडी तथा उनीहरूको प्रशिक्षण र व्यवस्थापनमा संलग्न जनशक्तिलाई नगद पुरस्कारसहित सम्मान गर्ने निर्णय गरेको छ । मंगलबार बसेको मन्त्रिपरिषद् बैठकले अन्तर्राष्ट्रिय प्रतियोगितामा पदक हासिल गर्ने खेलाडी, प्रशिक्षक, सहायक प्रशिक्षक, फिजियोथेरापिस्ट (फिजियो) तथा व्यवस्थापकलाई नगद पुरस्कार र सम्मानपत्र प्रदान गर्ने निर्णय गरेको हो । सरकारका अनुसार उक्त निर्णयले अन्तर्राष्ट्रिय स्तरमा नेपालको प्रतिष्ठा बढाउने खेलाडी र उनीहरूको सफलतामा योगदान पुर्‍याउने प्रशिक्षक तथा सहयोगी टोलीको योगदानको कदर गर्दै उनीहरूलाई प्रोत्साहन गर्ने उद्देश्य राखेको छ । यस निर्णयसँगै अन्तर्राष्ट्रिय प्रतियोगितामा उत्कृष्ट प्रदर्शन गरी पदक जित्ने खेलाडी र उनीहरूको तयारी तथा प्रदर्शनमा प्रत्यक्ष भूमिका खेल्ने प्रशिक्षक, सहायक प्रशिक्षक, फिजियो र व्यवस्थापकले सरकारले तोकेको मापदण्डअनुसार नगद पुरस्कार र सम्मानपत्र प्राप्त गर्नेछन् । यसअघि यस्ता खेलाडीहरुलाई पुरस्कार दिने घोषणा गरिए पनि प्रदान नगरेको गुनासो खेलाडीले गर्दै आएका थिए ।  

काठमाडौं । फुटबलमा एउटा चर्चित भनाइ छ, ‘आक्रमणले खेल जिताउँछ, तर रक्षाले उपाधि जिताउँछ ।’ यही भनाइ मंगलबार (आज) राति हुने २०२६ फिफा विश्वकपको पहिलो सेमिफाइनलमा परीक्षणमा पर्नेछ, जहाँ फ्रान्स र स्पेन आमनेसामने हुँदैछन् । अप्टा सुपरकम्प्युटरका अनुसार यस सेमिफाइनलबाटै अन्तिम विश्वविजेता निस्कने सम्भावना सबैभन्दा बढी छ । फ्रान्स र स्पेन दुवैको विश्वकप जित्ने सम्भावना इंग्ल्यान्ड र अर्जेन्टिनाभन्दा उच्च रहेको अनुमान गरिएको छ । अन्तिम चारसम्म पुग्ने क्रममा दुवै टोलीले फरक शैली अपनाएका छन् । स्पेनले मजबुत रक्षाको आधारमा सफलता हासिल गरेको छ भने फ्रान्सले आफ्ना स्टार खेलाडीहरूले भरिएको आक्रमणपंक्तिको भरपुर उपयोग गरेको छ । डलासमा हुने यो रोमाञ्चक भिडन्तअघि रोक्नै नसकिने आक्रमण र अभेद्य रक्षाबीचको सम्भावित संघर्ष कस्तो हुन सक्छ भन्ने विश्लेषण यहाँ प्रस्तुत गरिएको छ । स्पेन  स्पेनी फुटबलको चर्चा गर्दा धेरैले आकर्षक पासिङ खेल सम्झिन्छन्, तर प्रशिक्षक लुइस डे ला फुएन्टेको टोलीले पछिल्ला वर्षहरूमा उत्कृष्ट रक्षालाई पनि आफ्नो पहिचान बनाएको छ । स्पेनले आफ्नो परम्परागत छोटो पासिङ शैली कायम राख्दै यस विश्वकपमा प्रति खेल औसत ५९८ पास पूरा गरेको छ, जुन अर्जेन्टिनापछि दोस्रो धेरै हो । साथै ६६ प्रतिशत बल नियन्त्रणसहित प्रतियोगितामा सबैभन्दा धेरै समय बल आफ्नो नियन्त्रणमा राख्ने टोली पनि स्पेन नै हो । यति मात्र होइन, विपक्षीलाई अवसर सिर्जना गर्नबाट रोक्न पनि स्पेन सफल देखिएको छ । छ खेलपछि स्पेनविरुद्ध जम्मा सातवटा मात्रै लक्ष्यतर्फका प्रहार (शट अन टार्गेट) भएका छन् । सन् १९६६ यताका पुरुष विश्वकप इतिहासमा प्रति खेल औसत १.१७ शट अन टार्गेट मात्र सामना गर्ने यो सबैभन्दा उत्कृष्ट रक्षात्मक प्रदर्शन हो । स्पेनले विपक्षीको अपेक्षित गोल  पनि निकै कम राख्न सफल भएको छ । यस विश्वकपमा स्पेनले प्रति खेल औसत ०.३१ अपेक्षित गोल मात्रै विपक्षीलाई दिएको छ । सन् १९६६ यता यो उपलब्धिलाई सन् १९९० को विश्वकपमा उरुग्वेले मात्रै बराबरी गरेको थियो । स्पेनविरुद्ध गरिएका प्रहारहरूको औसत अपेक्षित गोल केवल ०.०५ रहेको छ, जुन २०२६ विश्वकपमा सबैभन्दा कम हो र १९६६ यताकै संयुक्त रूपमा न्यूनतम रेकर्ड पनि हो । रक्षा सामूहिक प्रयास भए पनि केही खेलाडीको प्रदर्शन विशेष उल्लेखनीय रहेको छ । मिड डिफेन्डर आयमेरिक लापोर्तेले स्पेनको रक्षापंक्तिलाई उत्कृष्ट रूपमा सम्हालेका छन् । उनले प्रतियोगितामा ११ इन्टरसेप्सन गरेका छन्, जुन फ्रान्सका डायोट उपामेकानो (१२) पछि दोस्रो धेरै हो । गोलकिपर उनाइ सिमोनले पनि रक्षापंक्तिको पछाडि पुग्ने बलहरू नियन्त्रण गर्न उत्कृष्ट प्रदर्शन गरेका छन् । स्पेनले उच्च प्रेसिङ गर्ने भएकाले रक्षापंक्ति पनि माथि खेल्ने गर्छ, जसका कारण सिमोनले ‘स्वीपर–किपर’को भूमिका प्रभावकारी रूपमा निभाएका छन् । प्रतियोगितामा उनीभन्दा बढी स्वीप गर्ने प्रयास केवल तीन गोलकिपरले मात्रै गरेका छन् । टोलीका कप्तान रोड्रीले पनि एसीएल (एन्टेरियर क्रुसिएट लिगामेन्ट) चोटबाट फर्किएपछि उत्कृष्ट लय समातेका छन् । उनले १८ ट्याकल गरेका छन्, जुन यस विश्वकपमा केवल तीन खेलाडीले मात्रै उछिनेका छन् । साथै उनले ३२ पटक बल पुनः आफ्नो टोलीको नियन्त्रणमा ल्याएका छन्, जुन प्रतियोगितामा पाँचौं उत्कृष्ट तथ्यांक हो । प्रशिक्षक डे ला फुएन्टेले आफ्नो रक्षापंक्तिमा निरन्तरता कायम राखेका छन् । उनाइ सिमोन, आयमेरिक लापोर्ते, पाउ कुबार्सी र मार्क कुकुरेल्लाले स्पेनका सबै खेलमा सुरुवाती रोजाइ पाएका छन्, र त्यसको प्रभाव मैदानमा स्पष्ट देखिएको छ । तर उत्तर अमेरिकामा उनीहरूलाई अहिलेसम्मकै सबैभन्दा कठिन परीक्षा सामना गर्नुपर्नेछ । फ्रान्स  विश्वकप सुरु हुनुअघि कागजमा हेर्दा फ्रान्सको आक्रमणपंक्ति अत्यन्तै बलियो देखिन्थ्यो । तर फुटबलमा कागजको अनुमान सधैं मैदानमा सत्य सावित हुँदैन । यसपटक भने अनुमान पूर्ण रूपमा सही सावित भएको छ । फ्रान्सले केवल छ खेलमा १६ गोल गर्दै प्रतियोगिताको सबैभन्दा घातक आक्रमण प्रदर्शन गरेको छ । फ्रान्सको आक्रामक तथ्यांक निकै प्रभावशाली छन् । टोलीले २०२६ विश्वकपमा ४७ शट अन टार्गेट गरेको छ । सन् १९९८ मा उपाधि जित्दा गरेको ५३ शट अन टार्गेटपछि यो विश्वकपमा फ्रान्सको उत्कृष्ट प्रदर्शन हो । प्रति खेल औसत ७.८ शट अन टार्गेट पनि सन् १९६६ यताकै सबैभन्दा उच्च हो । यसबाहेक प्रशिक्षक डिडिएर डेसाँको टोलीले प्रतियोगितामा सबैभन्दा धेरै अपेक्षित गोल सिर्जना गरेको छ । फ्रान्सले कुल १४.३ अपेक्षित गोल सिर्जना गरेको छ, जुन दोस्रो स्थानमा रहेको अर्जेन्टिनाभन्दा कम्तीमा १.६ बढी हो । टोलीमा रहेका विश्वस्तरीय खेलाडीहरूको गुणस्तर हेर्दा यो तथ्य अचम्मको होइन ।  फ्रान्सको आक्रमणको नेतृत्व कप्तान किलियन एम्बाप्पेले गरिरहेका छन् । उनले यस विश्वकपमा आठ गोल गर्दै गोल्डेन बुटका लागि लियोनेल मेसीसँग प्रतिस्पर्धा गरिरहेका छन् । एम्बाप्पे केवल गोलकर्ता मात्र होइनन्, उत्कृष्ट अवसर सिर्जनाकर्ता पनि हुन् । उनले १६ गोलको अवसर सिर्जना गरेका छन्, जुन प्रतियोगितामा केवल तीन खेलाडीले मात्रै उछिनेका छन् । साथै उनले तीन असिस्ट पनि दिएका छन् । एम्बाप्पेले हालका बालोन डी’ओर विजेता उस्मान डेम्बेलेसँग उत्कृष्ट साझेदारी बनाएका छन् । यी दुईले विश्वकपमा एकअर्काका लागि १९ अवसर सिर्जना गरेका छन् (एम्बाप्पेबाट डेम्बेलेका लागि १० र डेम्बेलेबाट एम्बाप्पेका लागि ९) । सन् १९६६ यता विश्वकपमा कुनै दुई खेलाडीबीच यस्तो स्तरको तालमेल निकै दुर्लभ मानिन्छ । डेम्बेले व्यक्तिगत रूपमा पनि उत्कृष्ट लयमा छन् । उनले छ खेलमा पाँच गोल र दुई असिस्ट गरेका छन् । एम्बाप्पे र डेम्बेलेसँगै माइकल ओलिसे पनि उत्तर अमेरिकामा फ्रान्सका प्रमुख नायक बनेका छन् । बायर्न म्युनिखका विङ्गर ओलिसे फ्रान्सका सबैभन्दा प्रभावशाली अवसर सिर्जनाकर्ता बनेका छन् । कठिन देखिने पासहरू पनि सहज रूपमा पूरा गर्ने उनको क्षमता उल्लेखनीय देखिएको छ । उनले पाँच असिस्ट गर्दै प्रतियोगिताको शीर्ष असिस्टकर्ता बनेका छन् । सन् १९९४ मा जर्मनीका थोमस हेस्लरपछि एउटै विश्वकपमा पाँच असिस्ट गर्ने उनी पहिलो खेलाडी हुन् । अब उनले पुरुष विश्वकप (१९६६ यता) मा सबैभन्दा धेरै असिस्ट गर्ने पेलेको कीर्तिमान बराबरी गर्न केवल एक असिस्ट मात्र आवश्यक छ । अझ रोचक पक्ष के भने, प्रशिक्षक डेसाँले आफ्नो आक्रमणको सम्पूर्ण शक्ति अझै प्रयोग गर्नुपरेको छैन । ब्राड्ली बारकोला र देजिरे डुएले सहायक भूमिकामा खेल्दै पनि संयुक्त रूपमा पाँच गोलमा योगदान दिएका छन्। बारकोलाले दुई गोल र एक असिस्ट गरेका छन् भने डुएले एक गोल र एक असिस्ट गरेका छन् । रायान चेर्कीले केवल ५० मिनेट खेल्ने अवसर पाएका छन् भने माग्नेस अक्लिउश र मार्कस थुरामले मिलेर जम्मा १० मिनेटभन्दा कम समय मैदानमा बिताएका छन् । यसले फ्रान्ससँग आक्रमणमा अझै प्रशस्त विकल्प रहेको देखाउँछ । अन्य सामग्रीहरू : कसले जित्ला विश्वकप ? यस्तो छ अप्टा सुपरकम्प्युटरको भविष्यवाणी इङ्ग्ल्यान्डको नायक बेलिङ्घम सेमिफाइनल समीकरण पूरा, फुटबलका चार महाशक्ति उपाधि दौडमा यी हुन् इङ्ल्यान्डले नर्वेलाई हराउन गर्नुपर्ने ६ मुख्य काम हालान्डको नाममै उन्माद ‘विश्वकप पहिले नै तय थियो ?’ अर्जेन्टिनालाई लिएर फैलिएका षड्यन्त्रका दाबीहरू विश्वकपमा अनुभवको दबदबा, इतिहासकै सबैभन्दा बढी उमेरका खेलाडी मैदानमा विश्वकपको उपाधि होड थप रोमाञ्चक क्रिस्टियानो रोनाल्डो : इतिहास रचे, तर विश्वकप ट्रफी चुम्न सकेनन् हालान्ड : दि नर्वेजियन हिरो चम्किँदै भिनिसियस जुनियर गोल्डेन बुटका दाबेदार विश्वकै भरपर्दा स्ट्राइकर ह्यारी केन डीआर कङ्गोको ऐतिहासिक यात्रामा इंग्ल्यान्डको चुनौती  यी हुन् विश्वकप जित्ने प्रमुख दाबेदार टोली [अप्टा विश्लेषण]  विश्वकपमा गोलको वर्षा, नकआउटअघि नै तोडियो सर्वाधिक कीर्तिमान  मेसी दि ग्रेट : जसले इतिहासका पानाहरू पुनः  लेख

काठमाडौं । फिफा विश्वकप– २०२६ का १०० खेल पूरा भइसकेका छन् । लामो यात्रा, धेरै खेल र रोमाञ्चक क्षणपछि प्रतियोगिता अब अन्तिम चरणतर्फ अघि बढिरहेको छ । क्वार्टरफाइनलका चारै खेल निकै प्रतिस्पर्धात्मक रहे ।  फ्रान्सले अन्ततः मोरक्कोलाई पराजित गर्यो, स्पेनले सुपर–सब मिकेल मेरिनोको अन्तिम समयको गोलमा बेल्जियमलाई हरायो, जुड बेलिङ्घम इंग्ल्यान्डका लागि नायक बनेर नर्वेमाथि जित दिलाए भने अर्जेन्टिनाले १० खेलाडीमा सीमित स्विट्जरल्यान्डको चुनौती अन्ततः तोड्न सफल भयो । अहिले घमण्ड गर्न खोजिएको होइन, तर अप्टा सुपरकम्प्युटरले अन्तिम चार टोलीको सही भविष्यवाणी गरेको थियो । प्रतियोगिता सुरु हुँदा विश्वकप जित्ने शीर्ष चार दाबेदार सबै टोली सेमिफाइनलमा पुगेका छन् । यही आधारमा अप्टा सुपरकम्प्युटरलाई फेरि सोधिएको छ, फिफा विश्वकप २०२६ को उपाधि अन्ततः कसले जित्ला ? पछिल्ला चार पुरुष विश्वकपमध्ये स्पेन, फ्रान्स र अर्जेन्टिनाले तीन उपाधि जितेका छन्। इंग्ल्यान्ड भने सन् १९६६ यता पहिलो पटक विश्वकप जित्दै ‘६० वर्षको प्रतीक्षा’ अन्त्य गर्ने लक्ष्यमा छ । फिफा विश्वकपको इतिहासमा यो तेस्रो पटक मात्र हो, जब सेमिफाइनलमा पुगेका चारै टोली पूर्व विश्वविजेता हुन् । यसअघि यस्तो सन् १९७० र १९९० मा भएको थियो । फ्रान्स सबैभन्दा बलियो दाबेदार अप्टा सुपरकम्प्युटरका अनुसार अहिलेको अवस्थामा विश्वकप जित्ने सबैभन्दा धेरै सम्भावना फ्रान्सको छ । डीडीए डेसाँको टोलीले उत्तर अमेरिकामा उत्कृष्ट प्रदर्शन गरेको छ । कप्तान किलियन एमबाप्पे आठ गोलसहित लियोनेल मेस्सीसँग संयुक्त रूपमा सर्वाधिक गोलकर्ता छन् भने उस्मान डेम्बेलेले पाँच गोल गरेका छन् । मोरक्कोविरुद्धको क्वार्टरफाइनलमा दुवैले एक–एक गोल गर्दै फ्रान्सलाई सेमिफाइनल पुर्याएका थिए । पछिल्ला ५० वर्षमा एउटै विश्वकपमा दुई खेलाडीले पाँच वा सोभन्दा बढी गोल गर्ने दोस्रो टोली फ्रान्स बनेको छ । यसअघि सन् २००२ मा ब्राजिलका रोनाल्डो (८) र रिभाल्डो (५) ले यस्तो उपलब्धि हासिल गरेका थिए । यस विश्वकपमा इंग्ल्यान्डका ह्यारी केन र जुड बेलिङ्घमले पनि समान रूपमा ६–६ गोल गरेका छन् । मोरक्कोमाथिको २–० को जितसँगै डेसाँले प्रशिक्षकका रूपमा विश्वकपमा २०औं जित निकाले । यो उपलब्धि हासिल गर्ने उनी पहिलो प्रशिक्षक बनेका छन् । विश्वकपमा उनको यो २५औं खेल थियो, जसले हेल्मुट शोनको कीर्तिमान बराबरी गरेको छ । स्पेनविरुद्धको सेमिफाइनल उनको २६औं खेल हुनेछ, जसले नयाँ कीर्तिमान बनाउनेछ । यो डेसाँको प्रशिक्षकका रूपमा अन्तिम विश्वकप पनि हो । विश्वकपका बाँकी खेलका २५ हजार सिमुलेसनमा फ्रान्स ५७.७ प्रतिशत अवस्थामा स्पेनलाई हराएर लगातार तेस्रो पटक फाइनल पुग्ने देखिएको छ । समग्रमा उपाधि जित्ने सम्भावना ३४ प्रतिशत छ । स्पेन पनि बलियो चुनौती स्पेन यस विश्वकपको दोस्रो सबैभन्दा प्रभावशाली टोलीका रूपमा देखिएको छ । लुइस डे ला फुएन्तेको टोलीले बेल्जियमविरुद्धको क्वार्टरफाइनलसम्म एक गोल पनि खाएको थिएन । फाबियन रुइजले अग्रता दिलाएपछि चाल्र्स डे केटेलारेले बराबरी गोल गरे । उनको हेडरले स्पेनको विश्वकपमा लगातार ६४९ मिनेटसम्म गोल नखाने श्रृंखला समाप्त गरेको थियो । तर पोर्चुगलविरुद्ध अन्तिम १६ मा जस्तै मिकेल मेरिनो फेरि बेन्चबाट आएर अन्तिम समयमा विजयी गोल गर्दै स्पेनलाई सेमिफाइनल पुर्याए । स्पेनको यो विश्वकप इतिहासको दोस्रो सेमिफाइनल हो । यसअघि सन् २०१० मा सेमिफाइनल पुगेर दक्षिण अफ्रिकामा पहिलो विश्वकप उपाधि जितेको थियो । फ्रान्स उपाधिको प्रमुख दाबेदार भए पनि स्पेन मार्च २०२४ मा कोलम्बियासँग १–० ले पराजित भएयता लगातार ३६ खेल अपराजित छ । यस अवधिमा उसले २७ जित र ९ बराबरी खेलेको छ, जुन उसको इतिहासकै सबैभन्दा लामो अपराजित यात्रा हो । सुपरकम्प्युटरका अनुसार स्पेनको फाइनल पुग्ने सम्भावना ४२.३ प्रतिशत र उपाधि जित्ने सम्भावना २३.४ प्रतिशत छ । त्यसैले मंगलबार डलासमा हुने फ्रान्स–स्पेन सेमिफाइनलका विजेताले विश्वकप जित्ने सम्भावना सबैभन्दा बढी रहेको अनुमान गरिएको छ । बेलिङ्घमको लयमा इंग्ल्यान्ड यस विश्वकपमा इंग्ल्यान्डले धेरै प्रभावशाली प्रदर्शन नगरे पनि टोली लगातार जित निकाल्न सफल भएको छ । प्रशिक्षक थोमस टुखेलले पनि नर्वेविरुद्ध टोलीले उत्कृष्ट खेल नखेलेको स्वीकार गरेका थिए । तर इंग्ल्यान्डलाई सेमिफाइनल पुर्याउन जुड बेलिङ्घमले निर्णायक भूमिका खेले । आन्द्रियास शेल्डेरुपले नर्वेलाई अग्रता दिलाएपछि बेलिङ्घमले पहिलो हाफमै बराबरी गोल गरे । अतिरिक्त समयमा मोर्गन रोजर्सको प्रहार गोलकिपर ओर्यान न्यालान्डले रोक्न नसक्दा रिबाउन्डमा बेलिङ्घमले दोस्रो गोल गर्दै टोलीलाई जित दिलाए । यसअघि अन्तिम १६ मा मेक्सिकोविरुद्ध दुई गोल गरेका बेलिङ्घमले नर्वेविरुद्ध पनि दुई गोल गरे । एउटै विश्वकपको लगातार दुई नकआउट खेलमा दुई वा बढी गोल गर्ने उनी सन् १९८६ मा डिएगो माराडोना पछि पहिलो खेलाडी बने । सन् २०१८ यता इंग्ल्यान्ड विश्वकप वा युरोपियन च्याम्पियनसिप गरी चार प्रमुख प्रतियोगिताको सेमिफाइनल पुगेको छ । त्यसअघि आफ्नो सम्पूर्ण इतिहासमा पनि इंग्ल्यान्डले यसरी नै चार पटक मात्र अन्तिम चारमा स्थान बनाएको थियो । अप्टा सुपरकम्प्युटरले इंग्ल्यान्डलाई विश्वकप जित्ने तेस्रो ठूलो दाबेदार मानेको छ ।  उपाधि जित्ने सम्भावना २१.९ प्रतिशत र सन् १९६६ पछि पहिलो पटक फाइनल पुग्ने सम्भावना ५०.९ प्रतिशत रहेको अनुमान छ । अर्जेन्टिना अझै पनि खतरनाक सेमिफाइनलमा इंग्ल्यान्डको सामना साविक विजेता अर्जेन्टिनासँग हुनेछ । यस विश्वकपमा पहिलो पटक लियोनेल मेसी गोल गर्न असफल भए । ३९ वर्षीय मेस्सीलाई गोल गर्न नदिने पहिलो टोली स्विट्जरल्यान्ड बन्यो । तर अर्जेन्टिनालाई त्यसले रोक्न सकेन । मेस्सीकै कर्नरमा एलेक्सिस म्याक एलिस्टरले हेडमार्फत गोल गर्दै अर्जेन्टिनालाई अग्रता दिलाए । दोस्रो हाफमा डान एनडोयेले बराबरी गरेपछि खेल अतिरिक्त समयमा पुगेको थियो । ग्राफिक्स : अप्टा एनालाइसिस ब्रिल एम्बोलोलाई भिडियो सहायक रेफ्री (भीएआर) को समीक्षापछि डाइभ गरेको ठहर गर्दै दोस्रो पहेँलो कार्डसहित रातो कार्ड दिइएपछि स्विट्जरल्यान्ड १० खेलाडीमा सीमित भयो । त्यसपछि जुलियन अल्भारेजले पेनाल्टी क्षेत्रबाहिरबाट शानदार गोल गर्दै अर्जेन्टिनालाई फेरि अग्रता दिलाए । अन्तिम समयमा लाउटारो मार्टिनेजले अर्को गोल थप्दै जित सुनिश्चित गरे । यो अर्जेन्टिनाको विश्वकप इतिहासको १३औं अतिरिक्त समयसम्म पुगेको खेल थियो । तीमध्ये ११ खेलमा (पेनाल्टी सुटआउटसहित) अर्जेन्टिना विजयी भएको छ । यससँगै अर्जेन्टिना र इंग्ल्यान्डबीच सन् २००२ पछि पहिलो पटक विश्वकपमा भेट हुने भएको छ ।  यद्यपि साविक विजेता भए पनि अप्टा सुपरकम्प्युटरले अर्जेन्टिनालाई बाँकी चार टोलीमध्ये सबैभन्दा कम सम्भावना भएको टोली मानेको छ । उपाधि जित्ने सम्भावना २०.६ प्रतिशत छ । तर इंग्ल्यान्डविरुद्धको सेमिफाइनल भने लगभग बराबरीको प्रतिस्पर्धा हुने अनुमान गरिएको छ । २५ हजार सिमुलेसनमध्ये ४९.१ प्रतिशतमा अर्जेन्टिना फाइनल पुगेको देखिएको छ । अन्य सामग्रीहरू : इङ्ग्ल्यान्डको नायक बेलिङ्घम सेमिफाइनल समीकरण पूरा, फुटबलका चार महाशक्ति उपाधि दौडमा यी हुन् इङ्ल्यान्डले नर्वेलाई हराउन गर्नुपर्ने ६ मुख्य काम हालान्डको नाममै उन्माद ‘विश्वकप पहिले नै तय थियो ?’ अर्जेन्टिनालाई लिएर फैलिएका षड्यन्त्रका दाबीहरू विश्वकपमा अनुभवको दबदबा, इतिहासकै सबैभन्दा बढी उमेरका खेलाडी मैदानमा विश्वकपको उपाधि होड थप रोमाञ्चक क्रिस्टियानो रोनाल्डो : इतिहास रचे, तर विश्वकप ट्रफी चुम्न सकेनन् हालान्ड : दि नर्वेजियन हिरो चम्किँदै भिनिसियस जुनियर गोल्डेन बुटका दाबेदार विश्वकै भरपर्दा स्ट्राइकर ह्यारी केन डीआर कङ्गोको ऐतिहासिक यात्रामा इंग्ल्यान्डको चुनौती  यी हुन् विश्वकप जित्ने प्रमुख दाबेदार टोली [अप्टा विश्लेषण]  विश्वकपमा गोलको वर्षा, नकआउटअघि नै तोडियो सर्वाधिक कीर्तिमान  मेसी दि ग्रेट : जसले इतिहासका पानाहरू पुनः  लेखे