२०७७ कार्तिक १२ गते ३:२५ विकासन्युज
काठमाडौं । दशैंपछि खुलेको पहिलो दिनको सेयर बजारमा उछाल आएको छ । ५ दिनपछि खुलेको बजारमा नेप्से परिसूचक ४१.२० अंकले उकालो लागेर १६४७.४५ बिन्दुमा पुगेको छ । जुन एक वर्षयताकै उच्च बिन्दु हो ।
बजारमा १८८ कम्पनीको २ अर्ब ७२ करोड ५९ लाख रुपैयाँ बराबरको सेयर कारोबार भएको छ । दिनभरको बजारमा ४२ हजार ६ सय १८ पटकमा ९३ लाख २२ हजार ८५ कित्ता सेयर किनबेच भएको हो ।
बुधबार ‘क’ वर्गको कारोबार मापन गर्ने सेन्सेटिभ इन्डेक्स पनि ९.२१ अंकले बढेर ३२७.७६ अंकमा पुगेको छ । जुन पछिल्लो कारोबारको तुलनामा २.८९ प्रतिशत बढी हो ।
बजारमा अधिकांश लगानीकर्ताहरु वाणिज्य बैंकतर्फ आकर्षित भएका छन् । बढी कारोबार हुनेको अग्रस्थानमा १० वटै वाणिज्य बैंकहरु रहेका छन् । बैंकहरूले डबल डिजिटमा लाभांश घाेषणा गरेसँगै र बाँकीले पनि साेही मात्रामा लाभांश घाेषणा गर्ने आशमा लगानीकर्ताहरू वाणिज्य बैंककाे सेयरमा आकर्षित भएका जानकारहरू बताउँछन् ।
जसमध्ये सबैभन्दा बढी ग्लोबल आईएमई बैंकको सेयर कारोबार भएको छ । बैंकको एकैदिन २० करोड ६५ लाख रुपैयाँ बराबरको सेयर किनबेच भएको छ । जसको सेयर मूल्य प्रतिकित्ता ३०१ रुपैयाँ रहेको छ ।
त्यस्तै, प्राइम कमर्शियल बैंकको १७ करोड ४४ लाख रुपैयाँ, प्रभु बैंकको १६ करोड २७ लाख रुपैयाँ, सिटिजन्स बैंकको १० करोड ७० लाख रुपैयाँ, नेपाल बैंकको ९ करोड रुपैयाँ बराबरको सेयर किनबेच भएको छ । त्यस्तै, कुमारी बैंक, एनआईसी एशिया बैंक, एनएमबी बैंक, सिभिल बैंक र मेगा बैंकको पनि साढे ६ करोड माथिको सेयर कारोबार भएको छ ।
बुधबार ट्रेडिङ्ग समूह बाहेक बाँकी समूह हरिया देखिएका छन् । सबैभन्दा बढी जीवन बीमा समूह ११० अंकले बढेको छ । विकास बैंक ६०, बैंकिङ्ग ५५ र निर्जीवन बीमा ४७ अंकले उकालो लागेको छ । ट्रेडिङ्ग समूह भने ८.८३ अंकले घटेको छ ।
बजारमा प्राइम कमर्शियल बैंकको सेयर मूल्य सबैभन्दा बढी अर्थात ९.९० प्रतिशतले बढेको छ । त्यस्तै, नेपाल फाइनान्सको ९.६४ र सिटिजन्स बैंकको ९.५५ प्रतिशतले सेयर मूल्य बढेको छ ।
प्रभु बैंकको ८.५० प्रतिशत र नेपाल इन्भेष्टमेन्ट बैंकको संस्थापक सेयर मूल्य ८.३३ प्रतिशतले बढेको छ ।
Copyright © 2024 Bikash Media Pvt. Ltd.