काठमाडौं । एसईईको नतिजा आउने बेला भइसकेको छ । एसईईको परीक्षा दिएर बसेका धेरै विद्यार्थीले के पढ्ने भनेर सोंचिरहेका छन् । आगामी दिनमा आफुले पढ्ने विषयको बारेमा कतिपय विद्यार्थीले आफ्नै रुची र क्षमताअनुसारको निर्णय गर्दछन् भने केही विद्यार्थीले अभिभावक र साथिभाईको सहयोग पनि लिन्छन् ।

सायद धेरै विद्यार्थीहरुले यतिबेला आफुले के विषय पढ्ने भनेर सल्लाह गर्ने र स्कुल भिजिट गर्ने काम पनि गरिरहेका होलान् । कतिपय विद्यार्थीहरुले घर सल्लाह पनि गर्दै होलान् ।

विकासन्युजले एसईई दिएर बसेका विद्यार्थीहरुलाई आगामी दिनमा आफुले पढ्ने विषय छनोट गर्न सजिलो होस भनेर सामाग्री तयार पारेको छ ।

कक्षा ११ र १२ मा कुन विद्यार्थीले कस्तो विषय रोजेर पढ्दा विद्यार्थीले सफलता पाउन सक्छ ? के भन्छन्, कलेजका प्रिन्सिपलहरु ?

डा. नगेन्द्र बहादुर अर्याल, प्रिन्सिपल, काठमाडौं मोडेल कलेज, काठमाडौं

पहिलो कुरा विद्यार्थीले आफ्नो रुची के रहेको छ त्यो कुराको थाहा पाउनुपर्यो । दोस्रो कुरा आफुले रोजेको विषयको प्रकृतिले कति मेहनत र समयको माग गर्छ र त्यो अनुसारको मेहनत र समय खर्च गर्न सकिन्छ कि सकिँदैन त्यसमा ध्यान दिनुपर्यो । तेस्रो कुरा विद्यार्थीले आफुले रोजेको विषयको स्कोप कस्तो छ ? त्यसमा आफुले भोलि करिअर बनाउन सकिन्छ कि सकिँदैन भनेर त्यसमा पनि ध्यान दिएर विषय छनोट गर्न जरुरी हुन्छ ।

छबिलाल पाण्डे, प्रिन्सिपल, प्रिमियर कलेज, काठमाडौं

विद्यार्थीले भोली आफ्नो करिअर कुन क्षेत्रमा बनाउने रुची छ, सो अनुसार कक्षा ११ र १२ पढ्दा नै विषयको छनोट गर्नुपर्दछ । विज्ञान विषय पढ्ने विद्यार्थीहरुले ३ कुरा रोजेको पाइन्छ, भोलि गएर इन्जिनियरिङ सेक्टर रोज्ने विद्यार्थीले फिजिकल, मेडिकल सेक्टर रोज्ने विद्यार्थीहरुले बायोलोजी र आइटी सेक्टर रोज्ने विद्यार्थीहरुले फिजिकल वा कम्प्युटर साइन्स लिएर पढ्न शुरु गर्दछन् । होटल म्यानेजमेन्ट र हस्पिटालिटी म्यानेजमेन्टमा जान चाहने विद्यार्थीहरुले होटल म्यानेजमेन्ट पढ्छन् । साधारण व्यवस्थापनमा जान चाहने विद्यार्थीहरुले एकाउन्ट, फाइनान्स, बैंकिङ, जस्ता विषयहरु पढ्ने गर्दछन् । त्यस्तै सिए क्षेत्रमा जान चाहने विद्यार्थीहरुले आधारभूत गणित विषय पढेर अगाडि बढेको देखिन्छ । विद्यार्थीहरुले यसरी विषय रोजेर अगाडि बढ्ने कुरा बैज्ञानिक पनि लागेको छ मलाई । त्यसैले विद्यार्थीहरुले के विषय पढ्ने भन्दापनि उनीहरुको आफ्नो के रुची छ र पछि गएर के बन्न मन लागेको छ भन्ने कुरालाई नै केन्द्रमा राखेर विषय रोज्नुपर्दछ ।

तोयानारायण पौडेल, प्रिन्सिपल, हिमालयन ह्वाइट हाउस इन्टरनेशनल कलेज, काठमाडौं

सबै विद्यार्थीको एउटै क्षमता हुँदैन । पहिला विद्यार्थीले आफ्नो क्षमतालाई पहिचान गर्नुपर्दछ । जुनसुकै विषय पढेपनि सो विषयमा सफलता हासिल गर्न सकेमा त्यसको हरेक क्षेत्रमा राम्रो स्कोप रहेको हुन्छ । डाक्टर, इन्जिनियर, पाइलट, आइटी, म्यानेज्मेन्ट, मानविकी, लगायत हरेक क्षेत्रमा करिअर बनाउनको लागि अलिकति मेहनत गर्न सक्ने विद्यार्थीहरुलाई कक्षा ११ र १२ मा साइन्स एजुकेसन पढ्न मैले सुझाव दिन्छु । किनकी साइन्स एजुकेसन पढेपछि विद्यार्थीलाई हरेक क्षेत्रमा प्रवेश गर्नको लागि सहज हुन्छ ।

हेरम्बराज कँडेल, प्रिन्सिपल, विश्वनिकेतन माध्यमिक विद्यालय, काठमाडौं

जुनसुकै विषय पढ्दा पनि राम्रो गर्न सकेमा जुनसुकै विषयमा पनि भविष्य छ । विद्यार्थीहरुको अलिक बढी राम्रो नम्बर आएमा साइन्स नै पढ्नपर्छ र ठिक्कको नम्बर आयो भने म्यानेजमेन्ट र अरु विषय पढ्ने भन्ने बुझाई रहेको छ । पहिला आफुले एसइइमा ल्याएको जिपिए हेर्ने । विद्यार्थीले भविष्यमा आफु के बन्ने र त्यसको लागि विषय निश्चित गरिसकेका छन् भने आफुले एसईईको परिक्षामा कति जिपिए ल्याउन सक्यो भन्ने कुरालाई पनि तुलना गर्नुपर्छ । किनकी डाक्टर इन्जिनियर पढ्छु भन्ने तर विज्ञान र गणितमा सी प्लस पनि आएको रहेनछ भने त्यो सम्भावना रहेन । आफ्नो क्षमता के छ त्यो आधारमा पनि उद्देश्य निर्धारण गर्नुपर्छ ।

सम्बन्धित शिषर्कहरु

लाइन सिफ्टिङ तथा केबल परिवर्तनका लागि यी स्थानमा विद्युत सेवा अवरुद्ध

दूधमा पनि बर्डफ्लुको भाइरस फेला

पर्यटकको रोजाइमा घोडेपानी, एक वर्षमा ३१ हजारले गरे भ्रमण

महासंघमा संयोजकको जिम्मा सापकोटालाई, प्राथमिकतामा व्यवसायीका समस्या समाधान

ऐसले फर्निचर शोरुम अब नेपालमा, नयाँ युगको शुरुवात गर्ने (फोटो फिचरसहित)

फास्ट ट्रयाक तोकिएकै समयमा बन्छ, लागत बढेको छैनः प्रधान सेनापति