२०७८ पुष ३० गते १८:०० विकासन्युज
काठमाडौं । राष्ट्रिय सहकारी बैंकले गत आर्थिक वर्षको नाफाबाट सेयर सदस्यहरुलाई १५ प्रतिशत लाभांश वितरण गरेको छ । बैंकले आर्थिक वर्ष २०७७/०७८ को कारोबारबाट शेयर सदस्य सहकारी संघ संस्थाहरुलाई १५ प्रतिशत लाभाशं वितरण गरेको हो ।
बैंकको १८ औं वार्षिक साधारणसभा सकिएकै दिन शुक्रवार बैंकले लाभाशं सदस्य संघ संस्थाको खातामा पठाएको हो ।
साधारणसभाले १५ प्रतिशत लाभाशं दिने निर्णय पारित गरेको लगत्तै बैंकले खातामा रकम पठाएको अध्यक्ष केबी उप्रेतीले जानकारी दिए । ‘बैंकको आज (शुक्रबार) साधारणसभा सकिँदैछ, लाभाशं पनि आजै सहकारीहरुको खातामा पठाएका छौं,’ उप्रेतीले भने ।
बैंकले यस पटकको साधारणसभा भौतिक उपस्थितिका विच एकाईगत रुपमा ७ वटै प्रदेशमा गरेको थियो । एकाई प्रतिनिधिहरुको साधारणसभा शुक्रवार सम्पन्न भएको र शुक्रवार नै देशभरका सहकारीहरुको खातामा लाभाशंको रकम पठाइएको हो ।
बैंकले गत आर्थिक वर्ष ०७७÷०७८ मा ३९ करोड ९५ लाख रुपैया लाभाशं वितरण गरेको हो । सहकारी बैंकले विगत ४ वर्ष देखि लगातार १५ प्रतिशत लाभांश प्रदान गर्दै आएको छ । सहकारीहरुमा वित्तीय साक्षरता, पहुँच तथा सहकारीहरुको हकहितसँगै नाफा गर्नमा पनि राष्ट्रिय सहकारी बैंक अब्बल बन्दै गएको छ ।
बैंकले वितरण गरेको लाभांशमा संरक्षित पूँजी फिर्ता कोषबाट प्राप्त गर्ने रकम समाबेश नगरिएको पनि जनाएको छ । बैंकले शुक्रवार नै एक विज्ञप्ती जारी गरी बैंकसँग कारोबार गर्ने सम्पूर्ण सदस्य संघ/संस्थाहरुलाई धन्यवाद ज्ञापन समेत गरेको छ ।
बैंकले छिट्टै नै सदस्यहरुलाई संरक्षित पूंजीफिर्ता कोषको रकम पनि सदस्यको खातामा पठाउने तयारी गरेको छ, बैंकले लाभांश बाहेक कारोबारका आधारमा संरक्षित पूंजीफिर्ता कोषबाट पनि सदस्य सहकारीहरुलाई रकम उपलब्ध गराउदै आएको छ ।
संरक्षित पूँजीफिर्ता कोषको रकम कारोबारको आधारमा दिइने र उक्त रकम केही समय पछि प्रदान गरिने बैंकका प्रमुख कार्यकारी अधिकृत बद्रीकुमार गुरागाईंले बताए ।
Copyright © 2024 Bikash Media Pvt. Ltd.