बर्दगोरिया गाउँपालिका सुदूरपश्चिम प्रदेशको राजधानी धनगढी देखी ७२ किलोमिटर पूर्वमा अवस्थित छ । यस गाउँपालिका प्राकृतिक स्रोत साधनका साथै धार्मिक तथा ऐतिहासिक सम्पदा, कला, सांस्कृतिक एवं पर्यटन लगायतका पक्षमा निक्कै धनी छ । यस गाउँपालिकाका अध्यक्ष बलिराम डंगौरा थारू हुन् । उनी निर्वाचित भएर आए पछि शिक्षा, स्वास्थ्य, पूर्वाधारलाई प्राथमिकतामा राखेर विकास निर्माणका योजना अगाडि बढाइरहेको छन् । यसैक्रममा गाउँपालिकाले अघि सारेका आर्थिक विकासको रणनीति, त्यहाँ गरिएका विकास निर्माणका काम, सम्भावना, चुनौती लगायत विषयमा केन्द्रित रहेर उनै अध्यक्ष थारूसँग विकासन्युजका लागि राजिव न्यौपानेले कुराकानी गरेका छन् ।

गाउँपालिकाको अध्यक्ष भएपछिका सुरुवाती दिनलाई कसरी सम्झनुहुन्छ ?

लामो समयदेखि जनप्रतिनिधिविहीन रहेको र सीमित कर्मचारीको भरमा विकास निर्माण लगायतका कामहरू गर्नुपर्ने बाध्यता थियो । जनताका असिमित इच्छा, आकांक्षा थिए । सीमित स्रोत र साधनको बिचमा विकास निर्माणको कामलाई गति दिनु पर्ने थियो । स्थानीय सरकारले जनशक्ति व्यवस्थापन कानुन कार्य नियमावलीको निर्माण, कार्यान्वयन गर्न समेत समस्या थियो । जनउत्तरदायी जनप्रतिनिधि नहुँदा नागरिकले गुनासो गर्ने र माग राख्ने कुरा कठिन थियो । त्यसैले निर्वाचित भएर आउँदा निकै चुनौती थिए । पहिलाको तुलनामा अहिले नागरिकले गाउँपालिकाप्रति अपनत्व महसुस गर्न पाएका छन् ।

तपाइँ निर्वाचित भएपछि गाउँपालिकाले हासिल गरेका उपलब्धि के–के हुन् नी ?

स्थानीय तहको निर्वाचन सम्पन्न भए पछि गाउँपालिकामा धेरै कामहरू भएका छन् । हामी निर्वाचित भएर आएको पनि ४ वर्ष पुरा भइसकेको छ । बिस्तारै गाउँपालिकाको समग्र क्षेत्रमा प्रगति भएको छ । त्यसैले पहिलाको तुलनामा हाल पालिकाको हरेक क्षेत्रमा सुधार र परिवर्तन आउनुका साथै उपलब्धि समेत भएको छ ।

कुन कुन क्षेत्रमा के–के प्रगति भए होलान् नी ?

स्थानीय सरकार सञ्चालन भए पछि पालिकाको समग्र क्षेत्रमा प्रगति भएको छ । हामीले आर्थिक, सामाजिक विकास, भौतिक पूर्वाधार, वातावरण संरक्षण आदि सबै क्षेत्रको विकास गरी नागरिकलाई कसरी सुखमय बनाउने भन्ने कुरामा जोड दिँदै आएका छौं । पालिकाले शिक्षाको क्षेत्रमा पनि उत्कृष्ट काम गरेको छ । विद्यालयका न्यूनतम भौतिक संरचनाहरू निर्माण गरी शैक्षिक गुणस्तरमा विशेष जोड दिएका छौं भने पालिकाको शैक्षिक स्तर धेरै माथि पुगेको छ । शिक्षालाई व्यवस्थित गर्न दरबन्दी नभएका विद्यालयमा अस्थाइ दरबन्दी तथा करारमा शिक्षकको व्यवस्था गरी पढाइलाई सहजीकरण गरेका छौं ।

हामीले स्वास्थ्य क्षेत्रमा पनि धेरै राम्रो कामहरू गरेका छौं । पालिकामा एम्बुलेन्सेको व्यवस्थापन गरी सेवासुचारु गरेका छौं । स्वास्थ्य संस्थाको सुधिरिकरण गरी त्यहाँको सेवा प्रवाहलाई चुस्तदुरुस्त बनाउने काम समेत भएको छ । पालिकाको स्वास्थ्य संस्थामा प्रजनन् केन्द्र समेत रहेको छ । हामीले पालिकाको प्रत्यके वडामा स्वास्थ्यचौकीको स्थापना गरी नागरिकलाई सहज रूपमा स्वास्थ्य सेवाको पहुँचसम्म पुर्याएका छौं ।

यसका साथै हाम्रो पालिका पर्यटकीय हिसाबले पनि महत्वपुर्ण छ । पर्यटन क्षेत्रको विकासका लागि लाखौं रुपैयाँ खर्च गरेका छौं । मठमन्दिर आदिको निर्माण भएका छन् । गाउँपालिकाको प्रशासनिक भवनको व्यवस्थापन गरी केही वडा कार्यालयका भवन पनि निर्माण गरेका छौं । हामीले पूर्वाधार निर्माणमा निकै महत्वपुर्ण काम गरेका छौं । सडकको स्तरोन्नती गर्ने, ट्र्र्याक खोल्ने समेत काम भएको छ । धेरै ठाउँमा कच्ची सडक छन् । कच्ची भए प्रत्येक वडामा सडक सञ्जाल पुर्याउन सफल भएका छौं । नमुना गाउँपालिकाका रूपमा विकास गर्ने दिगो लक्ष्य साथ पालिका अगाडि बढेको छ । नागरिकको घरमा खानेपानी पुर्याउने काम पनि भएको छ ।

चार वर्ष जनप्रतिनिधिका रूपमा काम गर्दाको अनुभव कस्ता रह्यो ?

हाम्रो कार्यकालको ५ वर्ष अवधिमध्ये ४ वर्ष पुरा भइसकेको छ । राजनीतिमा मेरो धेरै लामो संर्घष छ । अनुभव राम्रो रह्यो भने अहिलेसम्मको काम गराईबाट पनि सन्तुष्ट छु ।

आगामी दिनका योजना कस्ता छन् ?

राष्ट्र निर्माणको मेरुदण्ड स्थानीय सरकार बन्नसक्नुपर्छ, भन्ने मान्यता राखि दीर्घकालीन सोचका साथ दिगो विकासका योजना तर्जुमा गरी अगाडी बढ्ने सोच राखेका छौं । गाउँपालिका भित्र देखिएको विविध समस्यालाई न्यूनीकरण गर्दै यस भूगोलका जनताको सुख दुःख, पिरमर्कासँग उदारभावले अगाडी बढी खुल्ला सरकारको अनुभूति दिलाउने अभिप्रायमा हामी लाग्ने छौं ।

अनि पालिकाले कृषि क्षेत्रमा कस्तो कामहरू गरेको छ नी ?

कृषि क्षेत्रलाई पनि गाउँपालिकाले विशेष ध्यान दिएर अगाडि बढेको छ । गाउँपालिका कृषिमा आधारित जनतालाई व्यावसायिकतातर्फ उन्मुख गराउनमा लागिपरेको छ । कृषि क्षेत्रमा देखिने गरी केहि कामहरू भएका छन् । पालिकाका केहि कृषकहरू ब्यवसायिक तरकारी खेतीमा लागेका छन् । बाख्रा पालन, गाई तथा भैसिपालनमा गर्ने कृषिहरूलाई सहजीकरण गर्दै आएका छौं । पालिकाले पकेट क्षेत्रको अवधारण पनि अगाडि सारेका छ । उक्त पकेट क्षेत्रअनुसार कृषिका विभिन्न कार्यक्रमहरू पनि सञ्चालन गर्दै आएका छौं । कृषिहरूलाई गाउँपालिकाले ५० प्रतिशत अनुदानमा विउविजन, कृषिका यन्त्र पनि वितरण गर्दै आएको छ । अझै कृषि क्षेत्रलाई प्रभावकारी बनाउनको लागि चालु आर्थिक वर्षको बजेट पनि कृषि तथा पशुपन्छी क्षेत्रमा केन्द्रित छ ।

अनि चुनावी बाचा कति पुरा गर्नु भयो नी ?

चुनावी बाचाको संर्धवमा हामी लिखित प्रतिविद्धताका साथ जनतामाझ गएका थियौं । हामीले घोषणापत्रमा समयसामहिम विषयलाई नै धेरै जसो समेटेका थियौं । हामीले चुनाव अघि विद्युत, खानेपानी, सडक, सिचाइको सुविधा, कृषिलाई उत्पादन मूलक, स्वास्थ्य सेवा प्रत्येक वडामा पुर्याउने, शैक्षिक क्षेत्रको विकास गर्ने र गाउँपालिकालाई नमुना गाउँपालिका बनाउँछौं भनेका थियौं । हामी निर्वाचनमा जाँदा जनतालाई गर्न नसकिने प्रतिबद्धता र आश्वासन दिएका थिएनौं । गर्न सकिने काम इमानदारिता र पारदर्शी रूपमा गर्ने छौं, भनेका थियौं ।

आफूले गरेका प्रतिबद्धता समय समयमा स्मरण गर्ने गरेको छु । निर्वाचनको समयमा गाउँपालिकालाई सुन्दर, समृद्ध पालिका बनाउने प्रतिबद्धता व्यक्त गरेको थिएँ । अहिले ती काम धेरै पुरा भइसकेका छन् । केही काम वाहेक हामीले चुनावमा गरेको प्रतिबद्धता भन्दा धेरै काम गरेका छौं । यस्तो भन्दै गर्दा हामी र नागरिकले देखेको सपनाहरू सबै पुरा भए भन्ने होइन । हामीले गर्नुपर्ने काम अझै बाँकी नै छ ।

स्थानीयस्तरका युवाहरूलाई रोजगारी सृजना गर्नको लागि कस्ता प्रयासहरू भएका छन् ?

स्थानीयस्तरका युवाहरूलाई रोजगारी सृजना गर्नेतर्फ पनि हाम्रो ध्यान केन्द्रत छ । युवा उद्यमशीलता वृद्धि गर्ने पशु र कृषिमा आकर्षण वृद्धि गर्ने लक्ष्यका साथ गाउँपालिका अगाडी बढेको छ । पालिकामा विस्तरै साना तथा मझौला उद्योगकोस्थापना हुँदै छन् । उक्त उद्योग मार्फत पनि धेरै युवाहरुले रोजगारी पाउने आशा छ । पालिकाले विभिन्न स्वरोजगारका कार्यक्रमहरू पनि सञ्चालन गर्दै आएको छ ।

अन्त्यमा, के भन्न चाहनु हुन्छ ?

नजिकिँदै गरेको नेपालीहरूको महान् पर्व विजया दशमीको सवैमा हार्दिक मंगलमय शुभकामना व्यक्त गर्दछु ।

सम्बन्धित शिषर्कहरु

भिटामिन ए खुवाउने अभियान सञ्चालन (फोटोफिचर)

लघुवित्त संस्थाहरूको खराब कर्जा बढेका कारण प्रतिफल घट्यो

व्यापारी राज कुन्द्राको १ अर्बकाे सम्पत्ति जफत, शिल्पा शेट्टीको फ्ल्याटमा पनि ताला

अष्ट्रेलियाको बेरोजगारी दर ३.८ प्रतिशतले वृद्धि

लगानी सम्मेलनमा ३६ देशका ४६२ लगानीकर्ता सहभागी हुने, चीनबाट सबैभन्दा धेरै

दक्षिण एसियामै स्वच्छ ऊर्जाका लागि नेपालको भूमिका महत्वपूर्ण छ : अर्थमन्त्री पुन