काठमाडौं । असोज ४ गते निर्जीवन बीमा कम्पनी समूहको परिसूचक १२ हजार ६९ रहेको छ भने वाणिज्य बैंक समूहको परिसूचक ८५० रहेको छ ।

पछिल्लो समय निर्जीवन बीमा कम्पनीहरुको न्युनतम सेयर मूल्य ६०० रुपैयाँभन्दा बढी रहेको छ । तर अधिकांश वाणिज्य बैंकको सेयर मूल्य भने ३०० देखि ५०० रुपैयाँको हाराहारीमा छ ।

दोश्रो बजारमा वाणिज्य बैंकभन्दा बीमा कम्पनीको सेयर मूल्य बढी छ । १५/२० प्रतिशत लाभांश दिने बैंकभन्दा १०/१२ प्रतिशत लाभांश वितरण गर्ने बीमा कम्पनीको सेयरमा लगानीकर्ताले बढी मूल्य तिरिरहेका छन् ।

बैंकिङ समूहमा नबिल बैंकको सेयर सबैभन्दा बढी छ । जसको मूल्य प्रतिकित्ता १४ सय भन्दा कम छ । निर्जीवन बीमातर्फ राष्ट्रिय बीमा कम्पनीको सेयर मूल्य सर्वाधिक माथि छ, जसको मूल्य प्रतिकित्ता १८ हजार रुपैयाँ छ । यो कम्पनीले विगत ९ वर्षदेखिको साधारणसभा समेत गर्न नसकेकोले बीमा समितिले कारवाही गरेको छ ।

वाणिज्य बैंकमा सबैभन्दा सस्तो सेयर मूल्य सेञ्चुरी कमर्शियल बैंकको छ । जसले गत वर्ष ७.५ प्रतिशत लाभांश दिएको थियो । सेञ्चुरी बैंकले गत असार मसान्तसम्ममा ७५ करोड रुपैयाँ नाफा गरेको छ । निर्जीवन बीमा कम्पनीमा सबैभन्दा सस्तो सेयर मूल्य (प्रतिकित्ता ६१५ रुपैयाँ) जनरल इन्स्योरेन्सको छ । जसले गत असार मसान्तमा नाफा ९ करोड रुपैयाँ गरेको थियो ।

यस कारण बीमाको सेयर महँगो
बीमा कम्पनीले दिने लाभांश धेरै नभई सेयर आपूर्ति नै कम भएकोले बीमा समूहको सेयर मूल्य उच्च रहेको देखिएको छ । एक दिनको सेयर कारोबारलाई हेर्दा पनि उक्त कुरा प्रष्ट हुने गरेको छ ।

असोज ४ गतेको बजारमा पनि ननलाईफ इन्स्योरेन्सको ४ लाख १२ हजार ४११ कित्ता सेयर ४० करोड रुपैयाँ बराबरको सेयर कारोबार भएको छ । त्यसैगरी वाणिज्य बैंकको सोहि दिन ३५ लाख ५३ हजार कित्ता सेयर किता सेयर १ अर्ब ६० करोड रुपैयाँ बराबरका सेयर कारोबार भएको छ ।

सेयर कित्ता कारोबारका आधारमा बीमा समूह भन्दा बैंकिङ समूह साढे आठ गुणा बढी छ । रकम पनि साढे दुई गुणा बढी छ ।

कूल २० वटा बीमा कम्पनीले निर्जीवन बीमा व्यवसाय सञ्चालन गर्दै आएका छन् । जसमध्ये १८ वटा कम्पनीको सेयर दोश्रो बजारमा सूचीकृत छन् । सबै निर्जीवन बीमा कम्पनीको चुक्ता पुँजी २० अर्ब १७ करोड रुपैयाँ रहेको छ । जसको साधारण सेयर हिस्सा ८ अर्ब १६ करोड रुपैयाँ बराबर रहेको छ ।

सूचीकृत सबै निर्जीवन बीमा कम्पनीहरुको सेयर पुँजी भन्दा ग्लोबल आईएमई बैंक एउटाको सेयर पुँजी बढी छ । साधारण सेयर पनि सबै निर्जीवन बीमा कम्पनीहरुको योगभन्दा ग्लोबल आईएमई बैंक एउटैको बढी छ ।

ग्लोबल आईएमई बैंकको चुक्ता पुँजी २१ अर्ब ६३ करोड रुपैयाँ रहेको छ । जुन सूचीकृत निर्जीवन बीमा कम्पनीको भन्दा एक अर्ब ४६ करोड रुपैयाँले बढी हो । त्यस्तै, बजारमा साधारण सेयरको हिस्सा पनि निर्जीवन बीमा क्षेत्रको भन्दा ग्लोबल आईएमई बैंककै ९८ करोड रुपैयाँले बढी छ ।
बजारमा बीमा समूह अन्तर्गतका कम्पनीका सेयरको सप्लाई कम भएकै कारण उनीहरुको सेयर मूल्य बढी भएको जानकारहरु बताउँछन् ।

‘सबै निर्जीवन बीमा कम्पनीको सेयर पुँजी भन्दा एउटा बैंकको सेयर पुँजी बढी छ । बजारमा सेयर आपूर्ति कम भएकोले पनि बीमा कम्पनीको सेयर मूल्य बढी छ’ नेपाल निर्जीवन बीमा व्यवसायी संघको उपाध्यक्ष मनोहर दास मुलले भने । बीमा कम्पनीहरुले पुँजी बढाउन हकप्रद सेयर जारी गर्ने आशाले पनि बीमा कम्पनीहरुको सेयर मूल्य उच्च भएको उनको भनाई छ ।

निर्जीवन बीमा कम्पनीमा सबैभन्दा बढी शिखर इन्स्योन्सको रहेको छ । हाल इन्स्योरेन्सको चुक्ता पुँजी १ अर्ब ७५ करोड रुपेयाँ रहेको छ । त्यस्तै, नेको इन्स्योरेन्सको १ अर्ब ५२ करोड रुपैयाँ रहेको छ भने बाँकीको साढे १ अर्ब भन्दा कम रहेको छ ।

जसमध्ये राष्ट्रिय बीमा कम्पनीको सबैभन्दा कम चुक्ता पुँजी रहेको छ । हाल कम्पनीको चुक्ता पुँजी २६ करोड रुपैयाँ मात्रै रहेको छ ।

त्यस्तै, ९ इन्स्योरेन्स कम्पनीमा ५१ प्रतिशत संस्थापक र ४९ प्रतिशत साधारण सेयर रहेको छ । शिखर, नेपाल इन्स्योरेन्स, एनएलजी, प्रभु, आईएमई जनरल, सिद्धार्थ, हिमालयन जनरल, प्रिमियर र यूनाईटेड इन्स्योरेन्सको चुक्ता पुँजीको ४९ प्रतिशत सेयर साधारण रहेको छ ।

राष्ट्रिय बीमा कम्पनीको सबैभन्दा कम बजार हिस्सा रहेको छ । संस्थाको चुक्ता पुँजीको १२.२ प्रतिशत अर्थात ३ करोड रुपैयाँ बराबरको साधारण सेयर छ भने बाँकी २३ करोड रुपैयाँ संस्थापक सेयर रहेको छ ।

सम्बन्धित शिषर्कहरु

सूर्यज्योति लाइफ र प्रभु इन्स्योरेन्सको लाभांश सुरक्षित गर्ने आज अन्तिम दिन

सामुदायिक विद्यालयमा छोराछोरी भर्ना गर्ने अभिभावकको निःशुल्क स्वास्थ्य बीमा

संसारका ३० ठूला कम्पनीका सीईओ सबै भारतीय

टेलिकम उद्योगलाई आर्थिक स्वतन्त्रता दिनुपर्छ

नेपालमा स्वास्थ्य जनशक्ति : उत्पादनभन्दा गुणस्तरमा चुनौती

अर्थतन्त्रका समस्या समाधान गर्न ठूलो शल्यक्रियाको खाँचो छ, मलमपट्टीले हुँदैन