काठमाडौं । चालु आर्थिक वर्ष २०७७/०७८ को तेस्रो त्रैमासमा वाणिज्य बैंकहरुको आधारदर (बेसरेट) घटेको छ । गत आर्थिक वर्षको सोही अवधिको तुलनामा वाणिज्य बैंकहरुको आधारदर २.४६ प्रतिशतले घटेको हो ।

वाणिज्य बैंकहरुले सार्वजनिक गरेको तेस्रो त्रैमासको अपरिस्कृत वित्तीय विवरणका अनुसार बैंकहरुको आधारदर घटेको देखिएको हो । बैंकहरुको आधारदर घटेर अहिले अहिले औसत ६.९१ प्रतिशत कायम भएको छ ।

गत आर्थिक वर्षको सोही अवधिमा वाणिज्य बैंकहरुको औषत आधारदर ९.३७ प्रतिशत थियो । चालु आर्थिक वर्षको प्रत्येक त्रैमासमा वाणिज्य बैंकहरुको आधारदर घट्दै गएको तथ्यांकले देखाएको छ । यसअघि अर्थात चालु आवको दोस्रो त्रैमासमा बैंकहरुको औसत आधारदर ७.१९ प्रतिशत थियो । एक त्रैमास अर्थात तीन महिनाको अन्तरमै बैंकहरुको आधारदर ०.२८ प्रतिशतले घटेको छ ।

तेस्रो त्रैमासमा सबैभन्दा कम आधार दर भएको बैंकका रुपमा स्ट्यान्डर्ड चार्टड बैंक देखिएको छ । सो बैंकको आधारदर ५.३३ प्रतिशत रहेको छ । गत वर्षको सोही अवधिमा यस बैंकको आधारदर ७.२७ प्रतिशत थियो । गत वर्षको तुलनामा अहिलेको ब्याजदर १.९४ प्रतिशतले कम हो ।

यस्तै, कम आधारदर हुने बैंकको दोस्रो नम्बरमा राष्ट्रिय वाणिज्य बैक देखिएको छ । सरकारी लगानी रहेको यस बैंकको आधार दर तेस्रो त्रैमासमा आइपुग्दा ५.५० प्रतिशत कायम भएको छ । गत आर्थिक वर्षको सोही अवधिमा यस बैंकको आधारदर ६.७२ प्रतिशत थियो । यो एक वर्षको अवधिमा बैंकले १.२२ प्रतिशतले आधारदर घटाएको छ ।

सबैभन्दा बढी आधारदर भएको बैंकका रुपमा भने सिभिल बैंक देखिएको छ । सिभिल बैंकको आधारदर ७.८२ प्रतिशत छ । गत आर्थिक वर्षको सोही अवधिमा यस बैंकको आधार दर १०.९२ प्रतिशत थियो । गत आवको तुलनामा बैंकले ३.१ प्रतिशतले आधारदर कम गरेको छ ।
बैंकहरुको आधारदर घट्दा ऋणीका लागि सहज हुन्छ । बैंकहरुले आधारदरमा प्रिमियम थपेर व्याजदर तोक्छन् ।

आधारदर जति नै कम हुन्छ बैंकको व्याजदर पनि त्यतिनै कम हुँदै जान्छ । तेस्रो त्रैमासको वित्तीय विवरण हेर्दा सबैभन्दा कम आधारदर भएको स्ट्यान्डर्ड चार्टर्ड बैंकको कर्जाको व्याजदर पनि कम छ भनेर अनुमान गर्न सकिन्छ ।

आधारदरबाट पनि कुन बैंकको व्याजदर कतिसम्म हुन सक्छ अनुमान लगाउन सकिन्छ । कर्जाको ब्याजदर निर्धारण हुने मुख्य आधार नै आधारदर हो । राष्ट्र बैंकको नियम अनुसार राख्नुपर्ने तरलता, निक्षेपकर्तालाई दिने व्याज, बैंकका कर्मचारीको तलब भत्ता, बैंक सञ्चालनका लागि लाग्ने घरभाडा लगायतका खर्च धान्ने गरी बैंकहरुले व्याजदर निर्धारण गर्छन् ।

बैंकहरूले आधार दर भन्दा तल गएर कर्जा दिन पाउदैनन्। यो व्याजदर निर्धारण गर्ने आधार मात्र हो । आधार दर गणना गर्दा ब्याजदरलाई प्रभाव पार्ने तत्वहरूलाई समावेश गरिन्छ ।

विश्व महामारीका रुपमा फैलिएको कोरोना भाइरसको असर सुरु भएसँगै बैंकहरुले व्याजदर घटाएका थिए । अहिलेसम्म पनि घटाएको व्याजदर बैंकहरुले बढाएका छैनन् । व्याजदर सस्तो भएसँगै ऋणीहरुलाई पनि केही राहत हुने गरेकाे छ ।

सम्बन्धित शिषर्कहरु

१० बैंकको २० अर्ब वितरणयोग्य नाफा ऋणात्मक

महालक्ष्मी विकास बैंकले गर्यो महिला उद्यमी लक्षित सशक्तीकरण अभियान

गरिमा बैंक र ट्रेकिङ एजेन्सीबीच कर्जामा सहुलियत सहित सेवा उपलब्ध गराउने सम्झौता

कामना सेवाद्वारा पोखरा विश्वविद्यालयमा स्वास्थ्य प्रयोगशाला निर्माण गरि हस्तान्तरण

विकास बैंकका सूचक खस्किए, वितरणयोग्य नाफा ध्वस्त

ग्लोबल आइएमई बैंकको नयाँ एक्सटेन्सन काउन्टर तुल्सीपुरस्थित मालपोत कार्यालयमा