नेपालको गण्डकी प्रदेश अन्तर्गतको गोरखा जिल्लामा पर्ने एउटा सुन्दर एवं रमणीय गाउँपालिका हो ‘अजिरकोट गाउँपालिका’ । यस गाउँपालिकाको क्षेत्रफल १ सय ९८ दसमलव ५ वर्ग कि.मि रहेको छ भने यहाँको जनसंख्या भने २४ हजार ८ सय २ रहेको छ । ५ ओटा वडा रहेको यस गाउँपालिकाको सिमाना पूर्वमा सुलीकोट गाउँपालिका, पश्चिममा मलम्जुङ्ग जिल्ला, उत्तरमा चुमनुब्री गाउँपालिका र दक्षिणमा सिरानचोक गाउँपालिकासम्म रहेको छ । थोरै समथर टारहरु र अधिकांश पहाड हरियाली वातवरण र स्वास्थ्य हावापानी रहेको यो गाउँपालिकाको मुख्य नदीको रुपमा दरौंदी र चेपे रहेका छन् ।

सांस्कृतिक दृष्टिले समेत सबै जात, जाती, वर्ग र समुदायको संयुक्त बसोवास यो गाउँपालिकामा रहेको छ । यार्सागुम्बा, रथविरथ, पाँचऔले, नटामासी, कडुकी, सदुवा, निरमासी जस्ता औषधीजन्य जडीबुटी यो गाउँपालिका भित्र पाइन्छ । प्रकृतिक सम्पदा र मानवीय साधन स्रोतको समुचित परिचालन गरेको यो गाउँपालिका सफा, सुन्दर र समृद्ध पनि रहेको छ ।

गाउँपालिकाका ठुला योजना तथा परियोजनाहरु केके रहेका छन्, जनप्रतिनिधि निर्वाचित हुनु भन्दा अघि र भईसकेपछि गाउँपालिकामा कस्ता खाले परिर्वतन आएका छन्, युवालाई रोजगारीको अवसर गाँउपालिकाले कसरी सृजना गरिरहेको छ भन्नेलगायतका विषयमा सो गाउँपालिकाका अध्यक्ष फणिन्द्र प्रसाद धितालसँग विकासन्युजका लागि राजिब न्यौपानेले कुराकानी गरेका छन् । प्रस्तुुत छ उक्त कुराकानीको अंश ।

गाउँपालिकामा कोरोनाले पुर्याएको असर तथा हालको अवस्ता कस्तो छ नि ?

हाम्रो गाउँपालिकामा कोरोनाले सामान्य असर पुर्याएको छ । गाउँपालिकाका केहि स्वास्थ्यकर्मीमा कोरोना संक्रमण भएको थियो । हामीले गाउँपालिकामा सामुदायिक भवनलाई क्वारेन्टिन बनाएका थियौं । कोरोनाले यहाँको शिक्षा क्षेत्रका साथै विकास निर्माणको काममा पनि नराम्रो असर पुर्यायो । लकडाउनको समयमा गाउँपालिका भित्रका सबै विद्यालयहरु बन्द भएका थिए । तर हाल गाउँपालिकाको सबै विद्यालय सञ्चालनमा आइसकेको छ । सर्वसाधारणहरु पनि सामान्यरुपले जीवनयापन गरिरहेका छन् ।

गाउँपालिकामा रहेका ठुला योजना तथा परियोजनाहरु के-के छन् नि ?

गाउँपालिकाको भवन निर्माण गरेका छौं । २ करोड रुपैयाँको बजेटमा वडा भवन निर्माण भएको छ । सबै वडा कार्यालय भवनको निर्माण गरेका छौं । टोलटोल सामुदायिक बस्तीमा ३५ ओटा भवनको निर्माण गरेका छौं । गाउँपालिका भित्र रहेका सबै टोलमा सडक पुगेको छ । यतिमध्ये पनि यहाँका ठूला योजनाको रुपमा सडक विकासलाई नै लिन सकिन्छ ।

आफ्नो गाउँपालिका भित्रका पर्यटकीय क्षेत्रको प्रचार प्रसार कसरी गरिरहनु भएको छ ?

हाम्रो गाउँपालिका आफैंमा एउटा पर्यटकीय क्षेत्र पनि हो । पर्यटनको लागि बजेट पनि छुट्याएका छौं । गत साल ६० लाख रुपैयाँ बजेट छुट्याएका थियौं । हामीले गाउँपालिका भित्र मठ मन्दिरको पनि निर्माण गरेका छौं । गाउँपालिका भित्र होमस्टेको स्थापना पनि भइरहेको छ । भुमेथान मन्दिर पनि धार्मिक दृष्टिकोणले महत्वपुर्ण छ । नागपोखरी गाउँपालिका आफैंमा भ्युटावर छ । मुख्य पर्यटक गन्तव्यको रुपमा नागपोखरीलाई नै राखेका छौं । काठमाडौं बाट मात्र ४ घण्टामै हाम्रो गाउँपालिका आउन सकिन्छ । गाउँपालिकाबाट गणेश हिमाल पनि देख्न सकिन्छ ।

गाउँपालिकाले कृषि विकासका लागि के-कसरी काम गर्दै आएको छ ?

कृषि विकास गर्नकै लागि भनेर हामीले पशुपालन र तरकारी खेतिमा जोड दिएका छौं । यहाँका धेरै मानिसहरु कृषि पेशामा आवद्ध रहेका छन् । १ करोड २० लाख रुपैयाँ बजेट कृषि विकासका लागि छुट्याएका छौं । कृषिलाई आधुनिकिकरण गर्न लागिपरेका छौं । कम्पोष्ट मल बनाउने, भकारो सुधार गर्ने, पशुपालन गर्ने किसानलाई अनुदान दिने पनि भनेका छौं । सकभर किसानलाई जमीन बाँझो नराख्न आग्रह गरेका छौं । किसानको लागि भनेर हामीले अनुदानको पनि व्यवस्था मिलाएका छौं । धान, मकै कोदो, गहुँ, आलु, आदी हाम्रो गाउँपालिकामा उत्पादन हुने गरेको छ । खेती गर्ने किसानको लागि सिँचाईको राम्रो व्यवस्था छ । कृषि पकेट क्षेत्र पनि छुट्याएका छौं । हामीले गाउँपालिकामा हुने उत्पादन अनुसार पकेट क्षेत्र छुट्याएका छौं ।

गाउँपालिकामा विकास निर्माणको कामहरु कत्तिको प्रभावकारी भएका छन् ?

विकास निर्माणको कामहरु प्रभावकारी नै भइरहेको छ । जनप्रतिनिधिको रुपमा गाउँपालिकामा आइसकेपछि गरेका विकास निर्माणको काम प्रभावकारी नै भएका छन् । विकास राम्रो भएकाले जनताहरु मसँग खुसी छन् ।

तपाईं निर्वाचित हुनुभन्दा अघि र निर्वाचित भईसकेपछि गाउँपालिकामा कस्ता खाले परिवर्तन आएका छन् ?

म निर्वाचित भएर आईसकेपछि गाउँपालिकामा धेरै परिर्वतन आएको छ । निर्वाचित हुनु भन्दा अगाडि गाउँपालिकाका सबै ठाउँमा सडक पुगेको थिएन । कच्ची सडक धेरै थिए । यातायात सञ्चालन गर्न पनि कठीन थियो । मानिसहरु यातायात सञ्चालन नभएको कारण धेरै हिँडेर आफ्नो गन्तव्यसम्म पुग्नुपर्ने अवस्था थियो । वडा भवनको निर्माण भएको थिएन । बजेटको आकार सानो थियो । स्वास्थ्य सेवा तर्फ पनि नागरिकको राम्रो पहुँच थिएन । कर्मचारीहरु थेरै थिए । खानेपानीको राम्रो व्यवस्था थिएन ।

म निर्वाचित भएर आईसके पछि गाउँपालिकाको स्वास्थ्य, शिक्षा, खानेपानी, सडक आदिमा परिवर्तन आएको छ । विकास निर्माणको काम गरेका छौं । सडक निर्माणको काम भईनै रहेको छ । स्वास्थ्य सेवा सञ्चालन भएको छ । मेगा प्रोजेक्टको रुपमा ‘एक घर एक धारा’ रहेको छ । विद्युत थोरै ठाउँ वाहेक सबै वडामा पुगेको छ । विद्यालय भवनको निर्माण भएका छन् । गुणस्तरीय शिक्षा सिकाई प्रकिया अगाडि बढाई रहेका छौं । त्यसैले पहिलेको तुलनामा अहिले धेरै फरक र परिर्वतन आइसकेको छ ।

तपाईं निर्वाचित भएको ३ बर्ष पुरा हुँदा गाउँपालिका भित्र सम्झिन लायक काम के–के रहेका छन् नि ?

सम्झिन लायक काम धेरै रहेका छन् । मठ मन्दिरको निर्माण गरेका छौं । खेलकुदको विकासको लागि खेल मैदान निर्माण गरेका छौं । खानेपानीको राम्रो व्यवस्था मिलाएका छौं । सडक नुगेको ठाउँमा सडक पुर्याएका छौं । स्वास्थ्य चौकी सबै वडामा सञ्चालन गरेका छौं । गाउँपालिकाको भवनको निर्माण भएको छ । सडको कालोपत्रे भइरहेको छ । कतैकतै भने कालोपत्रे हुने क्रममा रहेको छ ।

स्थानीय तह र प्रदेश सरकारबीचको समन्वय कसरी गरिरहनु भएको छ ?

स्थानीय तह र प्रदेश सरकारबीचको समन्वय भई रहेको छ । योजनाको माग र अनुगमनको बारेमा नीति गत प्रस्टता हुनु पर्छे भनेर प्रदेश सरकारलाई भनेका छौं । विकास निर्माणको काममा पनि प्रदेश सरकारसँग हामी समन्वय गरिनैरहेका छौं ।

स्थानीय तहमा काम गर्दा मुख्य समस्याहरु के-के आई पर्छन् नि ?

नीतिगत काममा सामान्य समस्या छ । विकास निर्माणका काममा पनि यदाकदा समस्या आउँछन् । जनताको अपेक्षा, इच्छा धेरै छ त्यसैले अलिअलि समस्या आउनु त सामान्य कुरा नै हो ।

केन्द्र सरकारबाट कत्तिको सहयोग मिलेको छ ?

केन्द्र सरकारबाट राम्रै सहयोग मिलिरहेको छ ।

गाउँपालिकाले युवाहरुलाई रोजगारीको सिर्जना कसरी गरिरहेको छ ?

युवाहरुलाई लक्षित गर्दै १० लाख रुपैयाँ बजेट छुट्याएका छौं । युवाले राम्रो प्रोजेक्ट ल्याएका वेला सुलभ दरमा ऋण पनि उपलब्ध गराएका छौं । हाम्रो गाउँपालिकाका धेरैजसो युवाहरु कृषि पेशामा आवद्ध रहेका छन् । युवाहरुले पशुपालन, खेति, कुुखुरा पालन पनि गरेका छन् । युवालाई अनुदानको पनि व्यवस्था हामीले मिलाएका छौं । केहि युवाहरुलाई भने विकास निर्माणको काममा पनि लगाउँदै आएका छौं ।

तपाईंको पालिकामा सबैभन्दा ठुलो उद्योग वा व्यापारीक कम्पनी कुन हो ?

ठुलो उद्योग त हाम्रो पलिकामा छैन । यहाँ गरिने प्रमुख पेसा भनेको खेती किसानी नै हो । केही कृषकहरुले भने कुखुरा पालन, बाख्रा पालनजस्ता कामहरु पनि गरिरहेका छन् ।

सबैभन्दा धेरै कर तिर्ने कम्पनी चाहिँ कुन हो नि ?

सामान्य ठुङगा, गिटी, बालुवा जस्ता कुराहरु बाट कर संकलन हुने गरेको छ । पसल कर संकलन हुने गरेका छ ।

तपाईंले आफ्नो पालिकामा ‘एक गाउँ एक उत्पादन’ लाई जोड दिनुपर्याे भने कुन उत्पादनलाई जोड दिनुहुन्छ ?

‘एक गाउँ एक उत्पादन’ लाई जोड दिनुपर्याे भने म कृषिलाई नै जोड दिन्छु ।

तपाईंले गरेको कार्य प्रति तपाई कत्तिको सन्तुष्ट हुनुहुन्छ नि ?

म सन्तुष्ट नै छु । विकास निर्माणको काम पनि प्रभावकारी भएकोले होला नगारिकहरु पनि म सँग सन्तुष्ट नै रहेको पाउँछु ।

तपाईंको कार्यकालमा गाउँपालिकालाई कस्तो बनाउने योजना रहेको छ ?

मैले काम गरेको अवधिमै गाउँपालिकालाई विकसित बनाउने योजना छ । सकेसम्म गाउँपालिकामा सबै सडकलाई ग्राबेल गर्ने हो । स्वास्थ्य, शिक्षा राम्रो बनाउने हो । कृषिलाई आधुनिकारण गर्ने योजना पनि मेरो रहेको छ । यसका साथै पूर्वाधार विकामा पनि हामीले जोड दिएका छौं । जन्ताको इच्छा र चाहाना पुरा गर्ने मेरो योजना रहेको छ ।

सम्बन्धित शिषर्कहरु

बीमकलाई प्राधिकरणले भन्यो : भ्रम सिर्जना नगरी दावी भुक्तानी सुरु गर्नुस्

त्रिविका कानुनी सल्लाहकार खनाललाई कारबाही नगर्न आदेश

बैंकरका सामू राष्ट्र बैंक स्तब्ध

टीभीएस अपाचेको आरटीआर १६० सार्वजनिक, मूल्य तीन लाख बढी

सीईडीबी हाइड्रोले डाक्यो वार्षिक साधारण सभा, बुक क्लोज कहिले ?

प्राधिकरणको आम्दानीबाट विद्युत सहुलियत धान्न सम्भव छैन : घिसिङ