काठमाडौं । सरकारले यातयात व्यवसायीहरुलाई मध्यम प्रभावित क्षेत्रमा राखेपछि यातायात व्यवसायीहरु असन्तुष्ट भएका छन् ।

सरकारले कोरोना भाइरस (कोभिड–१९) बाट प्रभावित घरेलु, साना तथा मझौला उद्यम एवं पयर्टन व्यवसायका श्रमिक र कर्मचारीको पारिश्रमिक भुक्तानी तथा व्यवसाय सञ्चालन निरन्तरताका लागि प्रभावकारी ढङ्गले कर्जा उपलब्ध गराउन व्यावसायिक निरन्तरता कर्जा प्रवाह कार्यविधि तयार गरेकाे छ । साे कार्यविधिमा यातयात व्यवसायीलाई मध्यम प्रभावित क्षेत्रमा राखेपछि उनीहरु सरकारसँग असन्तुष्ट भएका हुन् ।

नेपाल यातायात व्यवसायी राष्ट्रिय महासंघका अध्यक्ष योगेन्द्रनाथ कर्माचार्यले आफूहरुले सरकारलाई पटक–पटक  आफ्ना समस्याहरु राख्दा पनि मध्यम प्रभावित क्षेत्रमा राखेको बताए । उनले मौखिक रुपमा अति प्रभावित भने पनि व्यवहारमा भने भने त्यसकाे कार्यान्वयन नहुने बताए ।

‘हामीले विभिन्न समयमा अर्थ मन्त्रालय र राष्ट्र बैंकका पदाधिकारी र अर्थमन्त्री स्वयमंलाई भेटेर हाम्रा समस्याहरु भनिसकेका छौं, उहाँहरुले हुन्छ भनेर प्रतिवद्धता गर्नु हुन्छ, त्यो प्रतिवद्धता व्यवहारमा देखाउनु हुन्न, हाम्रा समस्या कसैले कहिल्यै पनि बुझेनन्,’ उनले भने ।

आफुहरुले अति प्रभावितमा हुनु पर्ने आग्रह गरिरहँदा पनि त्यो कार्यान्वयन नभएको उनले गुनासाे गरे । अझै पनि हामीले नयाँ अर्थमन्त्रीलाई भेटेर कूरा गर्ने सोच बनाएको उनले बताए ।

‘यातयात क्षेत्रमा खर्बौ नोक्सान भएको छ, हामीले किस्ता र ब्याज तिर्न सकिरहेको अवस्था छैन, कर्मचारीलाई तलब दिन सक्ने हवस्था छैन,’ उनले भने ।

अर्थमन्त्रालयको प्रस्तावमा मन्त्रिपरिषदबाट पारित कार्यविधि अनुसार सहुलियत कर्जा उपलब्ध गराई व्यवसायको निरन्तरता दिन सरकारले कर्जा प्रवाह गर्नका लागि नेपाल राष्ट्र बैङ्कमा आवश्यक रकमको व्यवस्था गर्नेछ ।

अति, मध्यम तथा न्यून प्रभावित क्षेत्रहरु

(अ)  अति प्रभावित क्षेत्रः

• पर्यटनः
  • ट्रेकिङ्ग, ट्राभल एजेन्सी, पर्वतारोहण, र्‍याफ्टिङ्ग, क्याम्पिङ्ग, टुर अपरेटर, हिलिङ्ग सेन्टर, क्यासिनो, मसाज स्पा आदि,
  • होटल, पर्यटक आवास, मोटेल, ग्रामीण पर्यटन, होम स्टे, रिसोर्ट, तथा रेष्टुराँ, पर्यावरणीय पर्यटन, वन्यजन्तु आरक्ष,
  • साहसिक पर्यटन: स्किइङ्ग, ग्लाइडिङ्ग, वाटर र्‍याफ्टिङ्ग, हट एयर व्यालुनिङ्ग, क्यानोइङ, प्यारासेलिङ्ग, घोडचढी, हात्तीचढी, बन्जी जम्पिङ्ग, हिमाल आरोहरण र अवलोकन लगायत,
  • गल्फ कोर्स, पोलो, पोनी ट्रेकिङ्ग, पदयात्रा, माउन्टेन फ्लाइट सञ्चालन, केवलकार।
• हवाई तथा पर्यटकीय यातायात;
• मनोरञ्जन, मनोरञ्जन पार्क, रिक्रिएसन सम्बन्धी व्यवसाय, पार्टी प्यालेस;
• चलचित्र उत्पादन, वितरण, सिनेमा हल;
• स्वदेशमा वा विदेशमा रोजगारी गुमेका वा लेअफमा परेका श्रमिक, कामदार वा कर्मचारी;
• मूलभूत रुपमा सडेर गलेर जाने वस्तु (पेरिसेवल गुड्स) जस्तैः तरकारी, फलफूल, पुष्प, माछा मासु, दाना, दूध तथा दूधजन्य उत्पादन, अण्डा आदि उत्पादन तथा बिक्री वितरण;
• कुखुरापालन व्यवसाय;
• पशुपन्छी, मौरी तथा मत्स्यपालन व्यवसाय;
• तयारी पोशाक, हस्तकला तथा सीपमूलक व्यवसाय;
• वैदेशिक रोजगार सेवाप्रदायक, शैक्षिक परामर्श सेवाप्रदायक।

(आ) मध्यम प्रभावित क्षेत्रः

• खप्ने सामान जस्तै- प्लास्टिक, फलाम/स्टील, टायर, छाला, धातुका उत्पादन, घरायसी उपकरण आदि उत्पादन तथा बिक्री वितरणसँग सम्बन्धित उद्योग व्यवसाय;
• निजी तथा आवासीय विद्यालय, उच्च शिक्षालय तथा माध्यमिक विद्यालय, कलेज तथा विश्वविद्यालय, प्राविधिक शिक्षालय, प्रि-स्कूल, चाइल्ड केयर;
• यात्रुवाहक स्थल यातायात;
• ब्युटीपार्लर, सैलुन, कस्मेटिक सर्जरी लगायतका सामाजिक तथा व्यक्तिगत सेवाका क्रियाकलाप;
• कानूनी, लेखा, इन्जिनियरिङ्ग लगायतका परामर्श सेवा वा व्यवसाय;
• अस्पताल, क्लिनिक, नर्सिङ्गहोम, डायग्नोस्टिक सेन्टर;
• हेल्थ सेन्टर वा फिट्नेस सेन्टर;
• भण्डारण गर्न सकिने वस्तु (खाद्यान्न बाहेक) उत्पादन, प्रशोधन तथा बिक्री वितरण;
• वन तथा खनिजजन्य उद्योग;
• निर्माण व्यवसाय;
• औषधि उत्पादन;
• छपाइ, प्रकाशन तथा सञ्चार गृह;
• निर्माणाधीन जलविद्युत तथा नवीकरणीय उर्जा;
• पत्थर, माटो तथा सिसाका उत्पादन सम्बन्धी व्यवसाय।

(इ)  न्यून प्रभावित क्षेत्रः

• उत्पादनमा रही राष्ट्रिय प्रसारणमा जोडिएका जलविद्युत आयोजना;
• अनलाईन (इ-कमर्स) मा संलग्न व्यवसाय;
• खाद्यान्न उत्पादन, प्रशोधन, भण्डारण तथा बिक्री वितरण, पेय पदार्थ प्रशोधन तथा बिक्री वितरण गर्ने उद्योग व्यवसाय;
• दैनिक उपभोग्य अत्यावश्यक वस्तुको बिक्री वितरण;
• आयातजन्य व्यापार;
• पेट्रोल पम्प, ग्यास तथा पानी सम्बन्धित व्यवसाय;
• औषधि बिक्री वितरण;
• विज्ञापन सेवा;
• इन्टरनेट, दूरसञ्चार सेवाप्रदायक कम्पनी;
• मदिरा तथा सुर्तीजन्य उद्योग व्यापार, व्यवसाय;
• ट्रक, ढुवानी व्यवसाय;
• सुन, चाँदीका गहना तथा बहुमूल्य पत्थर सम्बन्धी व्यवसाय।

सम्बन्धित शिषर्कहरु

विकास बैंकका सूचक खस्किए, वितरणयोग्य नाफा ध्वस्त

बैंकविरुद्ध अराजक गतिविधिको नतिजा खराब कर्जा, २६२ प्रतिशतसम्म बढ्यो

खराब कर्जाका कारण बैंकहरूको नाफा साढे १३ प्रतिशत घट्यो, कुन बैंकको कति ?

नेपाल आएका पर्यटकको दैनिक औसत खर्च ४१ डलर

लघुवित्तहरूले नियम विपरित शुल्क लिएपछि राष्ट्र बैंकले गरायो १.१४ अर्ब रुपैयाँ फिर्ता

डिजिटल अर्थतन्त्रको अभ्यासमा नेपाल