काठमाडौं । विश्व महामारीका रुपमा फैलिएको कोरोना भाइरस (कोभिड १९) झन भयावह बन्दै गएको छ । यो भाइरससंक्रमणदर दिनप्रतिदिन झन व्यापक बन्दै गएपछि विभिन्न देशहरुले पुनः लकडाउन गर्न थालेका छन् ।

विशेष गरेर युरोपेली मुलुकहरुमा पछिल्लो समय कोरोना भाइरसको संक्रमणदर बढ्दै गएपछि लकडाउन गर्न थालिएको छ । युरोपेली मुलुक अस्ट्रियाले दोस्रो पटक देशव्यापी लकडाउन घोषणा गरेको गरिसकेको छ । अस्ट्रियाले रात्रिकालीन कफ्र्यू पछि दोस्रो पटक लकडाउन घोषणा गरेको हो ।

दोस्रो पटकको लकडाउन साढे दुई साताका लागि चान्सलर सेबास्टियन कुर्जले घोषणा गरेका हुन् । मंगलबारबाट लागू हुने नयाँ व्यवस्थापछि विद्यालयहरू बन्द हुने बताइएको छ । तर भर्चुअल माध्यमबाट पढाइ भने सुचारु हुने घोषणा गरिएको छ ।

अस्ट्रियामा शुक्रबार ९ हजार ५८६ नयाँ संक्रमित भेटिएका थिए। त्यस्तै शनिबार ७ हजार ६३ जना भेटिएका छन् भने ८५ कोरोना संक्रमितको मृत्यु भएको छ।
यससँगै हालसम्म अस्ट्रियामा १ लाख ९८ हजार कोरोना संक्रमित भेटिएका छन् भने १ हजार ७४६ संक्रमितको मृत्यु भइसकेको छ ।

यस्तै, युरोपेली मुलुक फ्रान्स, बेलायत लगाउत अन्य देशहरुमा पनि दोस्रो चरणको लकडाउनको घोषणा गरिएको छ । बेलायतमा हालसम्म १३ लाख मानिसहरुमा कोरोना देखिएको छ भने फ्रान्समा १९ लाख ५४ हजार ५ सय ९९ जना कोरोना संक्रमित भएका छन् ।

त्यस्तै नेपालमा पनि पछिल्लो समय कोरोना भाइरसका बिरामीहरु बढ्दै गएका छन् । विशेष गरेर काठमाडौं उपत्यकामा कोरोना भाइरसका बिरामीहरु बढ्न थालेका हुन् । पछिल्ला केही दिनयता नमुना संकलनको २५ प्रतिशतको हाराहारीमा कोरोना संक्रमण पुष्टी भइरहेको छ ।

नेपालमा पनि संक्रमण उच्च गतिमा विस्तार भइरहेकोले अबका दिनमा कसरी अघि बढ्ने भनेर स्वास्थ्य तथा जनसंख्या मन्त्रालयले परिस्थितिको अध्ययन गरिरहेको बताइएको छ । नोपलमा कोरोनाको संक्रमणदर नरोकिएपनि सरकारले तिहारपछि पुनः लकडाउन गर्ने होकि भन्ने अनुमान पनि गरिसकेका छन् ।

तर, गृह मन्त्रालयका अधिकारीहरु निर्णय भइसकेपछि मात्र यस बारे बोल्न उचित हुने बताउँछन् । उसो त काठमाडौं उपत्यका नगरपालिका फोरमले तिहारपछि उपत्यकामा लकडाउन गर्ने प्रस्ताव अगाडि बढाइसकेको छ । धेरैले यसलाई आधार मानेर पनि फेरि लकडाउन हुन सक्छ भन्ने आँकलन गरिरहेका छन् ।

कोभिड–१९ संकट व्यवस्थापन केन्द्र (सिसिएमसी) निर्देशक समितिका संयोजक समेत रहेका उप–प्रधानमन्त्री ईश्वर पोखरेल र काठमाडौं उपत्यका नगरपालिका फोरमका पदाधिकारी र सदस्यबीच गत बुधबार प्रधानमन्त्री कार्यालय सिंहदरबारमा करिब पाँच घण्टा लामो छलफल भएको थियो ।
फोरमले तिहार, छठ पर्व सकिएपछि कोरोना संक्रमण चक्र तोड्न प्रभावकारी कदम चाल्ने विषयमा छलफल गरेको थियो ।

बैठकमा उपप्रधानमन्त्री पोखरेल, गृहमन्त्री रामबहादुर थापा, स्वास्थ्यमन्त्री भानुभक्त ढकालले उपत्यकाका मेयरहरूलाई समन्वय गरेर अघि बढ्न आग्रह गरेका थिए।पछिल्लो समय मुलुकभर संक्रमण तथ्याङमध्ये करीब ५३ प्रतिशत उपत्यकामै रहेको भन्दै कोरोना रोकथाम र नियन्त्रणका लागि उपत्यकामा प्रभावकारी कदम चाल्नुपर्ने धारणा सिसिएमसीबाट उठेको थियो।

‘गृह मन्त्रालयका प्रवक्रा चक्रबहादुर बुढाले पनि स्वास्थ्य मन्त्रालयको सिफारिसका आधारमा कदम अगाडि बढाउने बताए । अहिले नै लकडाउन हुन्छ भन्न सकिन्नँ, परिस्थितीको अध्ययन गरिन्छ, विषयगत मन्त्रालयले के कस्तो सिफारिस गर्छन्, त्यसलाई आधार मान्ने हो, त्यसपछि मन्त्रिपरिषद्ले निर्णय गर्ने हो,’ उनले भने ।

सम्बन्धित शिषर्कहरु

डिजिटल अर्थतन्त्रको अभ्यासमा नेपाल

भारत छिर्दै टेस्ला, टाटा मोटर्सलाई चुनौती

हाइड्रोजन उत्पादनमा निजी क्षेत्र हतारिँदै, सरकार भने सुस्त

संसारका ३० ठूला कम्पनीका सीईओ सबै भारतीय

टेलिकम उद्योगलाई आर्थिक स्वतन्त्रता दिनुपर्छ

नेपालमा स्वास्थ्य जनशक्ति : उत्पादनभन्दा गुणस्तरमा चुनौती