काठमाडौं । प्रभु बैंकको सहवित्तीयकरण नेतृत्वमा २५.४ मेगावाट क्षमताको सुपर आँखुखोला जलविद्युत आयोजनाको वित्तीय व्यवस्थापन सम्पन्न भएको छ । कुल ४ अर्ब ५६ करोड रुपैयाँ लागतको सो आयोजनामा प्रभु बैंकको नेतृत्वमा ७५ प्रतिशत अर्थात ३ अर्ब ४२ करोड रुपैयाँ ऋण लगानी गर्ने सम्झौता भएको हो ।

शुक्रवार सम्पन्न एक कार्यक्रममा प्रभु बैंकको नेतृत्वमा कर्मचारी संचय कोष र कृषि विकास बैंकले गोरक्ष हाइड्रोपावर प्रा.लि.द्धारा प्रवर्तित उक्त आयोजनासँग ऋण लगानी सम्बन्धि सम्झौतामा हस्ताक्षर गरेका हुन् ।

उक्त आयोजनामा प्रभु बैंकले १ अर्ब ८२ करोड रुपैयाँ, कर्मचारी संचय कोषले ८५ करोड रुपैयाँ र कृषि विकास बैंकले ७५ करोड रुपैयाँ ऋण लगानी गर्ने भएका छन् । आयोजनामा कुल लागतको २५ प्रतिशत अर्थात १ अर्ब १४ करोड रुपैयाँ कम्पनीले संस्थापक र सर्वसाधारणबाट पूँजी मार्फत जुटाउनेछ ।

ऋण सम्झौतामा सहवित्तीयकरण नेतृत्व गर्ने प्रभु बैंकको तर्फबाट प्रमुख व्यापार अधिकृत रेनु प्रसाद पाण्डे, कर्मचारी संचय कोषका तर्फबाट ट्रेजरी तथा लगानी शाखा प्रमुख अर्जुन कुमार गौतम, कृषि विकास बैंकका तर्फबाट कर्जा लगानी शाखा प्रमुख मिनराज पोखरेल र गोरक्ष हाइड्रोपावरका तर्फबाट प्रबन्ध संचालक रघुनाथ पुरीले हस्ताक्षर गरेका हुन ।

धादिङ्ग जिल्लाको रुबीभ्याली गाउँपालिकामा निर्माणाधिन सो आयोजनाबाट सुख्खायाममा ४१.६३ गिगावाट आवर र वर्षायाममा ९६.६३ गिगावाट आवर गरी कुल वार्षिक १३८.२६ गिगावाट आवर विद्युत उत्पादन हुनेछ । कम्पनीले नेपाल विद्युत प्राधिकरणसँग टेक अर पेको आधारमा विद्युत खरिद बिक्री संझौतासम्पन्न गरिसकेको छ ।

विद्युतमा आत्मनिर्भर बनाउने नेपाल सरकारको लक्ष्यमा साथ दिँदै विद्युत तथा उर्जा विकास जस्ता राष्ट्रिय प्राथमिकताका क्षेत्रमा लगानी बढाउँदै जाने बैंकको लक्ष्य रहेको छ । सो बमोजिम बैंकले देशभर हालसम्म विभिन्न ४० भन्दा बढी विद्युत आयोजनाहरुमा लगानी गरिसकेको प्रभु बैंकका कार्यकारी अधिकृत अशोक शेरचनले जानकारी गराए ।

सम्बन्धित शिषर्कहरु

प्राइम बैंकको नाफामा १७ प्रतिशत छलाङ, प्रतिसेयर आम्दानी १९.७८ रुपैयाँ

कुमारी बैंकको ब्याज आम्दानी १२.६७ प्रतिशत बढ्यो, नाफा कति कमायो ?

नेपाल इन्भेष्टमेन्ट मेगा बैंकको नाफा ८ प्रतिशत बढ्यो

सानिमा बैंकको वितरणयोग्य नाफा ७.९५ प्रतिशत, खराब कर्जा घटायो

प्रभु बैंकको वितरणयोग्य नाफा धनात्मक, पौने २ अर्ब नाफा कमायो

लक्ष्मी सनराइज बैंकको नाफा २७.७० प्रतिशत बढ्यो