काठमाडौं । काठमाडौं उपत्यका बाहिर कार्यक्षेत्र बनाएर स्थापना भएका गरिमा विकास बैंक र सांग्रिला डेभलपमेन्ट बैंक अहिले काठमाडौंको लाजिम्पाट र बालुवाटारमा केन्द्रीय कार्यालय स्थापना गरेर देशव्यापी बैंकिङ सेवा प्रदान गरिरहेका छन् ।

एउटै बेल्टमा, करिब एकै समयमा स्थापना भएका यी दुबै बैंक अहिले राष्ट्रियस्तरका विकास बैंकमध्ये राम्रा बैंकमा गनिन्छन् । सांग्रिला डेभलपमेन्ट बैंक २०६३ सालको कात्तिकदेखि संचालनमा आएको हो भने गरिमा विकास बैंक २०६४ सालको कात्तिकदेखि संचालनमा आएको हो । स्याङ्जामा स्थापना भएको गरिमा र पोखरामा स्थापना भएको सांग्रिला विकास बैंकको पुँजी बृद्धिमा के कस्तो प्रतिस्पर्धा चल्यो र सेयरधनीलाई के कति लाभांश दिए भन्ने बारेमा यहाँ विश्लेषण प्रस्तुत गर्न खोजिएको छ ।

सांग्रिला डेभलपमेन्ट बैंक नेपालगञ्ज केन्द्रीय कार्यालय रहेको तत्कालिन बागेश्वरी डेभलपमेन्ट बैंकसँग मर्ज गरेपछि राष्ट्रियस्तरको विकास बैंक बनेको हो । सांग्रिलाले २०७४ को असार अन्तिमतिर कममस डेभलपमेन्ट बैंकलाई अक्वायर पनि गरेको थियो । सो बैंकको शाखा संख्या देशभर अहिले ९१ वटा छन् । बैंकको प्रमुख कार्यकारी अधिकृतमा अनुभवी बैंकर सुयोग श्रेष्ठ छन् । उनी विकास बैंकहरुका प्रमुख कार्यकारी अधिकृतहरुको संस्था डेभलपमेन्ट बैंकर्स एसोसिएसन नेपालका कोषाध्यक्षको जिम्मेवारीमा पनि छन् । बैंकको संचालक समितिको नेतृत्व अच्युतप्रसाद प्रसाईले संहालेका छन् ।

गरिमा विकास बैंक निलगिरी विकास बैंकसँग मर्जर भएपछि २०७२ सालमा राष्ट्रियस्तरको विकास बैंक भएको हो । गरिमामा सुभेक्षा विकास बैंक पनि मर्ज भएको छ । गरिमा विकास बैंक शाखा संजाल पनि ९१ वटा नै छन् ।

गरिमाको प्रमुख कार्यकारी अधिकृतको जिम्मेवारी खारिएका बैंकर गोविन्द प्रसाद ढकालले संहालिरहेका छन् । उनी डेभलपमेन्ट बैकर्स एसोसिएसन नेपालका अध्यक्ष पनि हुन् । बैंकको संचालक समिति अध्यक्षको जिम्मेवारी चन्द्रकान्त बरालले संहालिरहेका छन् ।

आर्थिक वर्ष २०६७/६८ मा गरिमा विकास बैंकले १८ प्रतिशत नगद लाभांश दिएको थियो । सो समयमा बैंकको चुक्ता पुँजी २० करोड रुपैयाँ थियो ।

सो आर्थिक वर्षमा चुक्ता पुँजी २० करोड रुपैयाँ भएको सांग्रिलाले १० प्रतिशत नगद लाभांश दिएको थियो ।

आर्थिक वर्ष २०६८/६९ मा गरिमाले १० प्रतिशत बोनस सेयर र १५ प्रतिशत नगद लाभांश दिएको थियो । सांग्रिलाले भने ११ प्रतिशत नगद लाभांश दिएको थियो ।

आर्थिक वर्ष २०६९/७० मा गरिमा पुँजी २२ करोड रुपैयाँ पुगेको थियो भने २० प्रतिशत बोनस सेयर र ५ प्रतिशत नगद लाभांश दिएको थियो । सो वर्ष ३२ करोड रुपैयाँ चुक्ता पुँजी पुर्याएको सांग्रिलाले भने १९.१७ प्रतिशत नगद लाभांश दिएको थियो ।

आर्थिक वर्ष २०७०/७१ मा सांग्रिलाको चुक्ता पुँजी ३२ करोड रुपैयाँ थियो भने १५ प्रतिशत बोनस सेयर र ६.३ प्रतिशत नगद लाभांश दिएको थियो । यस्तै, ३७ करोड ४० लाख रुपैयाँ चुक्ता पुँजी पुगिसकेको गरिमाले भने सो आर्थिक वर्षमा २० प्रतिशत बोनस सेयर र १.०५ प्रतिशत नगद लाभांश दिएको थियो ।

आर्थिक वर्ष २०७१/७२ मा गरिमाको पुँजी ५६ करोड १० लाख रुपैयाँ पुगेको थियो भने सेयरधनीलाई सो वर्ष २० प्रतिशत बोनस सेयर दिइएको थियो । यस्तै, ७३ करोड ६० लाख रुपैयाँ चुक्ता पुँजी पुगिसकेको सांग्रिलाले भने सो आर्थिक वर्षमा २०.८५ प्रतिशत बोनस सेयर दिएको थियो ।

आर्थिक वर्ष २०७२/७३ मा गरिमाको चुक्ता पुँजी ८८ करोड ८१ लाख रुपैयाँ थियो भने २० प्रतिशत बोनस दिइएको थियो । सोही आर्थिक वर्षमा सांग्रिलाको चुक्ता पुँजी १ अर्ब ७ करोड रुपैयाँ पुगेको थियो भने बोनस सेयर र नगद लाभांश गर िकरिब १७ प्रतिशत डिभिडेन्ड सेयरधनीले पाएका थिए ।

आर्थिक वर्ष २०७३/७४ मा गरिमा विकास बैंकको पुँजी २ अर्ब २० करोड रुपैयाँ पुग्यो भने उसले सेयरधनीलाई १५ प्रतिशत बोनस सेयर दियो । सोही आर्थिक वर्षमा १ अर्ब २४ करोड रुपैयाँ चुक्ता पुँजी पुगेको सांग्रिलाले भने २.५ प्रतिशत बोनस सेयर ९.३ प्रतिशत नगद लाभांश दिएको थियो ।

यस्तै, आर्थिक वर्ष २०७४/७५ मा गरिमाको पुँजी २ अर्ब ५३ करोड रुपैयाँ पुग्यो भने सो वर्ष बैंकले १० प्रतिशत बोनस सेयर र ३.७५ नगद लाभांश दियो । प्रतिस्पर्धामा सँगै आइरहेको सांग्रिलाले सो वर्ष मर्जरबाट पुँजी थप गर्दै चुक्ता पुँजी २ अर्ब ५० करोड रुपैयाँ कटायो भने ४ प्रतिशत बोनस सेयर र ५.४५ प्रतिशत नगद लाभांश दियो ।

आर्थिक वर्ष २०७५/७६ मा गरिमाको चुक्ता पुँजी २ अर्ब ७८ करोड रुपैयाँ पुगेको छ भने उसले १६.१५ प्रतिशत बोनस सेयर र ०.८५ नगद लाभांश दिएको छ । सो वर्ष २ अर्ब ६० करोड रुपैयाँ चुक्ता पुँजी पुगेको सांग्रिलाले भने ८.९५ प्रतिशत नगद लाभांश दिएको थियो ।

नेपाल राष्ट्र बैंकले मर्जर एक्वीजीसनको माध्यमबाट बैंक तथा वित्तीय संस्थाको संख्याको संख्या कम गर्न पहल थालेपछि धेरै विकास बैंकको अस्तित्व सकिएको छ । स्याङ्जा र पोखरामा केन्द्रीय कार्यालय स्थापना गरेर तोकिएका जिल्ला कार्यक्षेत्र गरी कारोबार सुरु गरेका यी दुबै बैंक काठमाडौं आएर पनि अब्बल प्रमाणित गरी एक अर्कासँग प्रतिस्पर्धा गरिरहेका छन् । अबका दिनमा यी दुबै बैंकले के कस्तो रणनीतिका साथ व्यवसाय विस्तार गर्ने र सेयरधनीलाई लाभांश दिन सक्नेछन् भन्ने थाहा पाउन भने प्रतिक्षा नै गर्नुपर्ने भएको छ ।

सम्बन्धित शिषर्कहरु

१० बैंकको २० अर्ब वितरणयोग्य नाफा ऋणात्मक

महालक्ष्मी विकास बैंकले गर्यो महिला उद्यमी लक्षित सशक्तीकरण अभियान

गरिमा बैंक र ट्रेकिङ एजेन्सीबीच कर्जामा सहुलियत सहित सेवा उपलब्ध गराउने सम्झौता

कामना सेवाद्वारा पोखरा विश्वविद्यालयमा स्वास्थ्य प्रयोगशाला निर्माण गरि हस्तान्तरण

विकास बैंकका सूचक खस्किए, वितरणयोग्य नाफा ध्वस्त

ग्लोबल आइएमई बैंकको नयाँ एक्सटेन्सन काउन्टर तुल्सीपुरस्थित मालपोत कार्यालयमा