सुर्खेत । खाद्य व्यवस्था तथा व्यापार कम्पनी लिमिटेड प्रादेशिक कार्यालय सुर्खेतले अनलाइन होम डेलिभरी सेवा शुरु गरेको छ । कर्णाली प्रदेशका उद्योग, पर्यटन, वन तथा वातावरणमन्त्री नन्दसिं बुढाले आज वीरेन्द्रनगरमा ‘नेपालफुड डट जिओभी डट एनपी’ पोर्टलको शुभारम्भ गरे ।

मन्त्री बुढाले कोभिड १९ को जोखिमबाट सुरक्षित रहन अनलाइन कारोबार प्रभावकारी माध्यम भएको बताए । उनले कर्णाली सरकारले आगामी आर्थिक वर्ष ४० हजार मेट्रिक टन खाद्यान्न खरिद गर्ने योजना रहेको जानकारी दिए । “प्रदेश सरकारले रोजगारी र खाद्य सङ्कटको अवस्थालाई सम्बोधन गर्ने गरी बजेट ल्याएको छ”, उनले भने, “मुख्यमन्त्री रोजगार, कामका लागि खाद्यान्न कार्यक्रममार्फत खाद्यान्न आपूर्तिको व्यवस्था मिलाउँदैछौँ ।”

कार्यक्रममा मन्त्री बुढाले अनलाइन होम डेलिभरीका पहिलो ग्राहक सुर्खेतका व्यवसायी लक्ष्मण कँडेललाई बिल हस्तान्तरण गरे । मन्त्रालयका सचिव डा कृष्णप्रसाद आचार्यले बन्दाबन्दीमा अनलाइन कारोवार बढेको बताए ।

खाद्य व्यापार कम्पनी लिमिटेडले कर्णालीको हिमालय क्षेत्रका अर्गानिक उत्पादनको बिक्री वितरण गर्न आग्रह गरे । कम्पनीका नायब महाप्रबन्धक श्रीमणिराज खनालले उपभोक्ता सूचना प्रविधिमैत्री हुन जरुरी रहेको बताए । कम्पनीले काठमाडौँ उपत्यका बाहिर पहिलोपटक कर्णालीमा अनलाइन होम डेलिभरी सेवा शुरु गरेको हो । रासस

सम्बन्धित शिषर्कहरु

निजी क्षेत्रको नेतृत्वमा उच्च र समावेशी आर्थिक वृद्धि हासिल गर्नुपर्छ

पूर्वमन्त्री आलमलाई जन्मकैदको फैसला

भारतीय कम्पनीलाई भुक्तानी गर्न अवरोध, इन्टरनेट काटिन सक्ने सेवा प्रदायकको चेतावनी

सर्वोत्तम सिमेन्टको १५ प्रतिशत लाभांश पारित, सञ्चालकमा ७ जना निर्वाचित

नेपालमा ग्रीन हाइड्रोजन परियोजनाका लागि कन्सियस इनर्जी र उर्जा डेभेलपर्सबीच साझेदारी

आङटावा शेर्पालाई ३० लाख धरौटीमा छोड्न सर्वोच्चको आदेश