पाल्पामा १७ करोड बराबरको आलु उत्पादन, गत वर्षको तुलनामा ६२ प्रतिशत वृद्धि
२०७३ चैत २१ गते १५:०७ विकासन्युज
पाल्पा। पाल्पामा यस आर्थिक वर्षमा १७ करोड रुपैयाँ बराबरको आलु उत्पादन भएको छ । जिल्ला कृषि विकास कार्यालयको तथ्याङ्कअनुसार जिल्लामा सात सय ३५ हेक्टर क्षेत्रफलमा उत्पादित सात हजार आठ सय ९० मेट्रिक टन आलु सो मूल्य बराबरको भएको जनाइएको हो । आलु खेतीका लागि अनुकूल समय र सङ्क्रमणले यस वर्ष कम सताएपछि अघिल्लो वर्षको तुलनामा उत्पादन बढेको हो ।गत वर्ष रु दश करोड बराबरको आलु उत्पादन भएको थियो ।
आव २०७१/७२ मा सात सय ३० हेक्टर क्षेत्रफलमा सात हजार पाँच सय १८ मेट्रिक टन आलु उत्पादन भएको थियो भने आव ०७२/७३ मा सोही क्षेत्रफलमा सात हजार पाँच सय २३ मेट्रिक टन आलु उत्पादन भएको कार्यालयका प्राबिधिक ज्ञानकुमार यादवले बताए ।
वरिष्ठ कृषि विकास अधिकृत किशोरमान श्रेष्ठ भन्छन्, “हिजोआज किसानले आलु लगाउने समयमा प्राविधिकसँग सल्लाह गरेर मात्र लगाउने र सङ्क्रमण नियन्त्रणका लागि समय समयमा प्राविधिकलाई देखाइरहने गरेकाले क्षति हुनबाट सुरक्षित भएका हुन् ।” कार्यालयको सिफारिसमा किसानले यस वर्ष टिपियस, कार्डिनल, कुप्रिज्योति, स्थानीय जातका आलु लगाएका छन् । जिल्लाको रामपुर, अर्गली, माडीफाँट, सर्देवा, हुँगीलगायत क्षेत्र आलु उत्पादनका लागि मुख्य पकेट क्षेत्र मानिन्छन् । कार्यालयका अनुसार यहाँ उत्पादित रातो आलु प्रतिकेजी रु २५ र सेतो आलु प्रतिकेजी रु २० मा बिक्री भइरहेको छ । रासस
सम्बन्धित शिषर्कहरु
Copyright © 2024 Bikash Media Pvt. Ltd.